Kingdom of the Planet of the Apes 2024-ah

20th Century Studios chuan thuchhuah siamin 'War of the Planet of the Apes' chhunzawmna tur film chu 'Kingdom of the Planet of the Apes' tih a nih dawn tih leh kum 2024-ah tlangzarh a nih dawn thu an puangzar.

Thlaleh hian production an ṭan tawh dawn tih an tarlang bawk a, Owen Teague, Freya Allen, leh Peter Macon-te chu a changtu turte an ni. 'War of the Planet of the Apes' hnu kum tam tak liam hnua thil thleng angin an siam dawn a, Wes Ball chu director a ni dawn bawk.

Planet of the Apes franchise hi 20th Century Studios film hlawhtlinpui ber zinga mi niin khawvel pum box office aṭangin he franchise hi $tluklehdingawn 1.7 chuang a lalut tawh a ni. Pierre Boulle lehkhabu ziah behchhana siam niin kum 1968 khan a franchise film hmasa ber chu tihchhuah daih tawh niin tihchhuah kuma film hlawhtling ber pawl a ni hial. A chhunzawmna pali bakah TV series pahnih lai an siam leh a ni. Chumi hnu chuan an reh deuh vang vanga, kum 2001 khan thar thawh lehin kum 2011 khan a reboot 'Rise of the Planet of the Apes' chu an siam thar leh a ni.