Sikkimese film ‘Pahuna’ Ṭawng 14-in let dawn

Sikkimese film lar ‘Pahuna: The Little Visitors’ chu ṭawng hrang 14-a leh a ni dawn.

Actor aṭanga film siam lama inlet ta leh, he film director ni bawk Paakhi Tyrewala chuan ‘Pahuna' hian ngaihhlut a hlawh hle tih sawiin, ṭawng hrang hranga let tur pawh hian ngenna an dawng hnem hle tih a sawi. Mipuite ngenna avangin ṭawng chi hrang 14-ah lehlin tuma hma lak mek a nih thu sawiin, an puitlin thei a nih chuan Sikkimese film zinga a hmasa ber tur a nih thu a sawi.

‘Pahuna' hi Bollywood film star lar Priyanka Chopra leh Purple Pebbles Production ṭangkawp ten an siam a ni a, Toronto International Film Festival-ah pawh chhuah a ni. Festival-a chhuah a nih ṭum hian a entu mipuite chuan standing ovation an pe hial a, ngaihhlut a hlawh takzet a ni.

Film director Pakhi chuan, "‘Pahuna' kan siam dawn hian harsatna kan tawk nasa hle a, producer-te chuan ṭum 10 zet min hnawlsak a ni. Mahse a tawpah chuan Priyanka Chopra kan tawng fuh a, Purple Pebbles Production (Sikkim)-te nen ṭangkawpin kan puitlin thei ta a ni" tiin harsatna an tawh nasat thu a sawi. Khawvel hmuha 'The Little Visitors' pholan a nih theih nana tha leh zung tam tak sengtu Priyanka leh Dr Madhu Chopra-te chungah lawmthu a sawi bawk.

He film hi Nepalese nau­pang pathum, Maoist helte avanga an nu leh pa te kalsan a, Nepal chhuahsana Sikkim pan ta te chanchin tarlanna a ni.