Bollywood actor Tom Atler a thi

American mi, Bollywood lama actor lar Tom Atler chu vun cancer vangin a thi. Kum 67 mi Atler-a nu leh pa hi India rama missionary hnathawk niin nal takin Hindi a ṭawng thei a, movie 300 chuangah inlanin television leh theatre lamah a inhmang bawk.

Alter hian film chan piah lamah journalism lamah pawh sulhnu a nei nual. Kum 1980-90 chho khan television lamah sports journalist niin television-a Indian cricketer ropui Sachin Tendulkar interview hmasa bertu a ni. Sachin chuan, "TV-a kan interview hmasa ber kaltlang khan infiamna hmangaihtu leh mi fel tak ka tawng a, kan thinlungah i cham reng ang," tiin Alter hi a thlah.

Kum 2008-a chawimawina sang Padma Shri dawngtu Alter hian kum 1990 chhoa TV serial lar tak Junoon hmangin a hming a chher chho a, a channa langsar zingah Gandhi (1982) leh One Night with the King (2006) chu a hlawhtlinpui hle bawk.

Atler chhungte chuan thu­chhuah siamin, "Kan pa thihna avangin hrehawm takin awm mah ila thlamuang takin a chawl ta tih kan hriatna hian min thlamuan hle. Tom-a in hmangaihna leh a chunga in khawngaihna in lantirna zawng zawngah lawmthu kan sawi a ni," an ti.

Lehkhabu pathum lai ziaktu ni bawk Alter thihnaah hian India Prime Minister Narendra Modi pawhin thuchhuah a siam a, Alter chhungkua a tawrhpui thu a sawi.