Tanpui ngai tan Beyonce
Zaithiam lar Beyonce Giselle Knowles chuan tun hnaia thlipui na tak (hurricane) in a nuai avanga chhiat tawkte tan a aw a thawh. American singer hi J Balvin leh Willy William te hla Mi Gente-ah a inrawlh ve a, he hlaah hian Spanish, French leh English ṭawng hmangin a zai a ni.
September 28 khan Mi Gente hi tun lai zaithiam te inpho chhuahna langsar tak pakhat YouTube-ah dah a ni a, darkar chanve chhung lekin mi 100,000 chuangin an en hman a, nimin tlai thleng kha chuan entu 10,674,012 zet an awm tawh.
California star chuan an hla thar chungchang hi instagram page lamah a tarlang a, "Puerto Rico leh Mexico bakah Caribbean Islands chhunga chhiat tawkte tan he hla aṭanga ka sum hmuh te chu ka thawh vek dawn," tiin a sawi.
Beyonce a che chhuak tawh a, a pasal Jay-Z pawh a awm mai mai dawn bik lo. Jay-Z hian Chris Brown, Cardi B, Daddy Yankee, DJ Khaled, Jennifer Lopez, AiAP Ferg, Fifth Harmony leh Iggy Azalea te bakah zaithiam ṭhenkhat nen October 17 hian Brooklyn-ah charity concert an buatsaih dawn. American singer leh songwriter ni bawk Bruce Springsteen pawhin ṭanpui ngaite pual hian special edition live album a buatsaih tawh bawk a ni.