Naupang tana ṭangkai tur app

School la kal miah lo hian ziak leh chhiar bakah chhiarkawp thiamna hi phone leh computer aṭang chauhin an zir thei ang em tih hi zawhna a tling.

United Nations Edu­cational, Scientific and Cultural Organization (UNESCO) hnuaia Institute for Statistics-in a chhut danin khawvel pumpuia naupang mak­taduai 263 chu school kal lo an ni. Hei vang hian Elon Musk leh XPRIZE te chuan naupang zirtir thei tur app siam hmanga inelna an buatsaih a, dollar maktaduai 10 dawn theihna tur a ni.

Team 198 zetin inelna hi an hmachhawn a, finalist panga te thlan tawh niin dollar maktaduai khat ṭheuh pek an ni. Finalist te chu CCI (United States), Chimple (Inda), Kitkit School (United States), one billion (United Kingdom) leh RoboTutor (United States) te an ni.

November thla hian finalist-te siam edu­cational apps zirchianna chu Tanzania bial chhunga thingtlang khaw 150 chhunga naupang 4,000 bawr velah enchhin a ni ang. Heng naupangte hian Google pek tablet hmangin apps hi an belchiang ang a, anmahni an inzir dawn a ni.

UNESCO hnuaia Institute for Statistics in a zirchian danin kum 2030-ah chuan UN duh dan anga zirtir hna kalpui tur chuan zirtirtu maktaduai 68.8 lak a ṭul dawn a, hei hi thil theih a ni lo. Chuvangin tuna XPRIZE buatsaih inelna hi a hlawhtling a nih chuan sum tlem zawk hmangin naupang ṭhahnem tak hnenah zirna kalpui theih a ni ang.