US musician lar Tom Petty a fam ta
US musician lar leh hlawhtling Tom Petty chu nimin (US sana) khan kum 66 mi niin, California-ah a thi.
Petty hi lung lam ṭha lo niin, Thawhṭanni khan a chenna Malibu-ah ni khaw hre loin hmuh a ni a, Hospital panpui a nih hnuah a thi zui ta a ni. A thih leh thih loh chngchangah hian thu chiang a awm lawk loh hnuah, a manager Tony Dimitriades chuan a thih thu hi a rawn nemnghet ta a ni. Tony Dimitriades chuan Tom Petty thih thu hi a Twitter-ah a tarlang a ni.
Petty hi Tom Petty and The Heartbreakers rock band-ah lead singer niin, khawvelin a hriat larna pawh a ni. An hla sak - American Girl, Breakdown, Free Fallin, Learning to Fly leh Refugee-te chu mite hriat hlawh zual a ni.
A thih thu hian khawvel a deng chhuak rang hle a, amah uitu zingah musician lar Sir Paul McCartney, Carole King, Brian Wilson leh Cyndi Lauper-te pawh an tel a, an ui thu an sawi uar hle.
McCartney chuan, "Khawvelin Petty a chan ta, a kalsan tak a chhungte ka tawrhpui tak zet a ni" a ti.
Petty hi 1980s vela din Traveling Wilburys group-ah co-founder niin, Bob Dylan, Roy Orbison, Jeff Lynne leh George Harrison-te nen tour te pawh an lo ho nei ho tawh a ni. Kum 1989 khan ama pualin solo album 'Full Moon Fever' a tichhuak a, heta a hla 'Free Fallin' phei chu a hun lai chuan a lar hle a nih kha.
Tom Petty hi kum 1950 khan Gainesville, Florida-ah a piang a, kum 17 a nihin zirna chawlhsanin 'Mudcrutch' a zawm a, Heartbreakers Mike Campbell leh Benmont Tench-te nen band dinin, bul an ṭan.
Kum 1970 khan record contract hmuh beiseiin Los Angeles an pan a, mimalin hlawhtling viau mah se band ang chuan beisei an phak zui lo. A musician puite nen kum 1975 khan 'Tom Petty and The Heartbreakers' an din leh ta a, he ta ṭang hian khawvel chuan a hre zui ta a ni. Music industry-a a thawh hlawk avang hian kum 2002 khan 'Rock and Roll Hall of Fame'-ah a hming ziah luh a lo ni tawh bawk.
Amah hi musician, singer, songwriter, multi instrumentalist leh record producer nikawp a ni a, music khawvela mi thawh hlawk zinga mi a ni.