Min ban kha ka vanneih phah - Lisa Kudrow

Internet awm hnu chuan video hlui tawh a lar thar leh ṭhin. Kum 2010-a Vassar 146th commencement-a Lisa Kudrow-i thusawi pawh a lar thar leh hle a nih kha.

Lisa hi serial lar Friends-ah Phoebe Buffay lemah changin khawvel huapin a lar a, hemi hma hian Frasier aṭanga ban a ni. Amaherawhchu hlawhltinna a chan takah chuan American actress Lisa hian a hun harsa paltlang chu Vassar College naupangte fuih nan a hmang. "Ban ka ni ta mai kha a vanduai thlak ka ti a, ka eizawnna tura ka ngaiah ka hlawmchham kha na ka ti. Mi zawng zawngin ka hlawhtlin an ring a, ka hlawhtling reng bawk," tiin Lisa chuan a hlawhtlin nghal loh thu a sawi. Frasier-ah hian Lisa hi episode khatah chiah a inlan hman tihin ban a ni.

Kum 54 mi Lisa chuan sawi zelin, "Thla a vei chuan ka sum neih zawng zawng deuh tho ka hmang zo a ni ber a, amaherawhchu kawngka a inkhar chuan kawngka dang a inhawng leh ṭhin. Keimah leh keimah nasa takin ka infuih a, audition tam tak ka paltlang a, a hnuah chuan Friends chan tura thlan ka ni," tiin hun harsa a paltlang chanchin a sawi.

Friends hmangin khaw­velin Lisa a hria a, kum 54 mi chuan, "Frasier aṭanga min ban kha ka vanneih phah a ni. Khata kha chuan awm reng ila Friends-ah hian telna remchang ka nei lo ang," tiin vanneih a intih thu a sawi uar hle.

Lisa Kudrow, Jennifer Aniston, Courteney Cox, David Schwimmer, Matt Le Blanc leh Matthew Perry-te channa Friends hi khawvelin a lawm. Lisa hian hneh sawh takin Phoebe lem a chang a, ṭhut hmun aṭangin 'Smelly Cat' leh thil dang tam tak kan nuih pui a, hemi phenah erawh thawhrimna a awm thung.