Las Vegas chhiat tawkte tan Miley Cyrus

Zaithiam lar Miley Cyrus chuan Las Vegas chhiatna avanga nunna chante tan 'The Climb' a sa. American singer Miley hian a hla hit The Climb hi kum ruk chhung ngawt chu live-in a sa ngai tawh lo a, October 2 zana Tonight Show-a a inlannaah he hla hi a sa leh chauh a ni.

October 1 zan khan country music festival-ah Jason Aldean-a zai laiin inpawng kahna a thleng a, mi 59 ngawt thiin mi 500-in hliam an tuar - nunna chan leh hliam tuarte pualin Miley chuan he hla hi a hlan.

Miley hian Tonight Show host Jimmy Fallon hnenah, "He hla sak leh hun hi a her chhuak dawn a nih chuan tun hi sak hun a ni. Kum nga emaw kum ruk hnua live-a he hla ka sak leh hmasak ber tur a ni dawn a, a chhan chu he hla hi huaisen taka harsatna hmachhawn thu leh beidawng mai loa bei tura infuihna a nih vang a ni," a ti a, Las Vegas chhiatna avanga hnual mai tur an nih loh thu a sawi.

Kum 24 mi lek singer hian show hawn nan hian Adam Sandler nen “No Freedom" tih chu an sa dun bawk a, studio-a show chhimtute lawm an hlawh hle. Mi lar tam takin Las Vegas chhiatna an tawrh pui thu social media lamah an tarlang nasa a, Miley bakah hian tunlaia tleirawlte lawm hlawh ber tih ngam Justin Bieber chuan, "Chak thei ang berin awm ila, hlauhna hian min hneh thiang lo," tiin a fan-te a fuih a, "Nunna chante leh hliam tuarte ka hre reng a, an tan ka ṭawngṭai a ni," tiin a sawi bawk.