Nizanah 10:45 a ri!

'No Khat' hla hmanga Zofate thiam taka min awitu Grace 10:45 chuan nizan khan music video thar 'Sawm leh li nga' a tichhuak.

Grace 10:45 hian a hla thar hi nizan khan a YouTube chhannel lamah a dah chhuak a, a zai ngaina ṭhin tan chuan a ngaihven chi hle ang. Ṭhenkhat chuan kan en tawh mai thei a, a hming tawpa 10:45 a dah awmzia i hriat duh chuan Grace-i music video thar hi lo thlirin lo ngaithla ve phawt mai teh.

Blue wave records kut chhuak niin, producer Bza nen hla dang hmachhawp pawh an nei nual nghe nghe. Video chu Mawitea RDS shots a ni thung a, Grace nen idea an thawh dun nasa hle niin Bza chuan Vanglaini a hrilh.

'Sawm leh li nga' hi Indie folk lam a pawl lek lekin, tunlai ṭhalaite lawm zawng tak a ni a, a sak thiam bakah music video hmuh a nuam hle a ni.

EP thar a hnai
Grace 10:45 hian EP thar turah hian hla paruk a awm dawn a, nizana a hla tihchhuah thar 'Sawm leh li nga' hi a title track a ni nghe nghe.

Vanglaini zawhna chhangin Grace-i chuan, "Ka tihchhuah hun tur tak ka la sawi mai thei lo a, mahse ka tichhuak thuai dawn a ni," a ti a, hla thar hlak vek a dah dawn tih sawiin amah phuah vek a nih dawn thu a sawi bawk a ni.