Arini Music Video thar kan hmu dawn ta

Mizoram Presbyterian Synod hnuaia Synfo buatsaih “Praise On 2016” Mizo­ram pumhuap malzai intihsiakna neih ṭuma pakhatna leh a hmasaber nihna chelhtu, Nl R.Lalrinmawii (Arini) Music Video hmasaber chu Demand Channel leh Youtube lamah kan hmu dawn hnai ta e.

A aw sang tak leh Voice Control turu tak hmanga Judge-te tilungawi em em thintu, intihsiakna neih chhung zawnga round tina rilru chhungril tak atanga Pathian fak hla hmanga mipuite min awi thintu, Durtlang Leitan Nula Arini hi intihsiak zawh atang khan a reh deuh vang vang a nih kha. A chhan chu BA final year exam a ngaih vang leh a hunawl neihah hmun hrang hrangah zaia rawngbawlna nei tura sawmtu a ngah em avangin Music Video buaipui turin hun awl a neilo a ni ber.

Tunah erawh BA tha taka a pass hnuah a zai ngainatute tana thu lawm­awm tak nen Music khawvelah a rawn lang dawn ta e. Tun tuma a hla thar tur hi Sap hla lehlin “Krawsah khan” tih a ni dawn a. He hla Mizo tawnga mawi taka letling tu hi Pu Laltanpuia Durtlang Leitan niin, a aw nena inmil tak maia Music arrange-tu hi kan hriat lar tak leh Music khawvel a mikhual lo tak Kima Chhangte a ni thung.

Recording hi Masky Record kut­chhuak a ni a, belhchiang a dawl leh hle tura ngaih a ni. Music Video hi Gabriel Graphics kutchhuak a nih avangin Video dangdai tak lo beisei leh phawt bawk ila a sual a rinawm loh. Arini hian a Music Video siam hmasak ber lo entu zawng zawngten thlarau lamah hlawkna pakhat tal chang se tih chu a duhsam ber a ni.