Hugh Hefner lemah Jared Leto

Kar hmasa Nilaini khan Hugh Hefner a thi a, a thih aṭanga kar khat pawh a liam hmain Playboy magazine publisher chanchin hi Hollywood lam chuan film-a siam an tum thu an puang a - Hefner lema chang tur hian Jared Leto chu biak thluk a ni.

Kum 45 mi actor hi Dallas Buyers Club movie hmuhnawm takah khan transgender (neih thlak thleng) lemah alo chang tawh a, tun hnaia tihchhuah lar em em Suicide Squad-ah khan Joker-ah a chang bawk.

The Hollywood Reporter chuan Thawhlehni khan kum 91 mi nia thi Hefner chanchin film-a siam a nih tur thu leh Jared Leto-a'n Playboy hotupa lem a chan tur thu hi an puang chhuak a ni. He film-ah hian Hollywood director ṭhangduang ber pawl Brett Ratner chu director tur a ni.

Kum 48 mi Ratner hi kan hriat theih dan tur chuan film hlawhtling tak tak Rush Hour, Hercules leh Tower Heist-te direct-tu kha a ni a, Hefner film tur hi RatPac Entertainment chuan a buaipui hna an thawk mek.

Ratner chuan, "Jared hi ka ṭhian ni ṭhin a ni a, Hefner-a chanchin film-ah ka siam dawn tih a hriat khan, "Hefner hriatchian lehzual nan a lema chan hi ka duh a ni," tiin min hrilh. Kan tunlai khawvela kan actor neih ṭhat ber zinga mi a nih avangin keipawhin ṭha taka a chan chhuah theih ka beisei a ni," a ti.

American tennis star Serena Williams nen pawha lo 'in chu kha' tawh Ratner hian April thla khan 'American Playboy: The Hugh Hefner Story' an premier naah Leto hi a lo sawm tawh a, Hefner erawh a dam ṭhat loh avangin a hmu hman lo thung.

Mahse, Ratner chuan, "Hef-a chanchin hi kha docu­mentary-ah khan a tam tawk a, khata ṭang pawh khan Jared hian tam tak a inzir thei ang," tiin a sawi.