Kate leh Leonardo in 'Di' ngai lo

Titanic film-ah Jack leh Rose-te an inhmangaih a, amaherawhchu Kate Winslet leh Leonardo DiCaprio-te hi a takah chuan ṭhian ṭha chauh an ni.

Kum 41 mi Winslet chuan an pahnih chungchang sawiin, "Thla sarih chhung rim takin hna kan thawk ho a. Titanic chan hun lai khan kan la ṭhalai a, vanneih thlak takin, Leo nen khan ngaihzawng enin kan inen lo. Thil awihawm loh tak pawh a ni thei a, mah se hei hi thil thlen dan chu a ni si," tiin Titanic-a a chanpui Leonardo nena an inkar thu a sawi chhuak.

Film producer lar James Cameron-a kut chhuak Titanic hi kum 1997 khan tihchhuah a ni a, Academy Awards-ah nomination 14 hmuin 11-ah lawmman a dawng. Sum lakluh lamah pawh Titanic hi dollar tluklehdingawn khat lalut hmasa ber a ni.

Leonardo nen an la inkawmngeih reng tih sawiin Winslet chuan, "Kan la inbe reng a, Titanic-a kan ṭawngkam hman ang te kha la chhep chhuakin kan la infiam tawn reng a ni. Kan inbiakna tam tak erawh ho lam tak tak a ni a, sawi chhuah vek tlak pawh a ni lo," a ti.

Fa pathum nei tawh Winslet chuan, "Ka fate leh an ṭhiante pawhin Titanic-a kan thu hman ang chiah kha an la sawi chhuak thei a, kei phei chuan ka theihngilh tawh te a ni hlawm. Film chan hun lai pawha la piang lo te an nih avangin minti upa hle a ni," tiin a uang pah bawk. Titanic lawng lian pil dan tihmuhnawm turin thawnthu ngaihnawm tak an zep a, Rose leh Caledon Nathan-te an inhual vek tawh hnuah Jack a inrawlh. Cal-a lema chang Billy Zane chuan, "Khawvel hi chi hniha ṭhen a ni. Hmeichhia kum lama naupang deuh chuan, 'Jack-a chungah khan engtin nge kha ti khan i chet theih le,' an ti a, kum lama upa tawh chuan, 'Rose khan eng rilru nge a put reng reng,' an ti thung," tiin uang pahin upat hnuah chuan sum an ngaih pawimawh thu a sawi.