Zaninah Chanmari YMA Hall-ah Sem a ni dawn ta
Zonet buatsaih 'Thazual Award 2017' chu zanin dar 7:30 hian Chanmari YMA Hall-ah sem a ni dawn ta.
Thazual Award 2017 sem tura zaithiam te performance tur hi Mizoram-a kan la hmuh zen zen loh leh hmuhnawm dangdai tak tak tur te an ni nawk. Zaithiam zai turte hi an zai ringawt piah lamah an rawn lamin, LED screen-te nen performance puitling tak tak theuh an rawn chhawpchhuak dawn. Mizo-te'n music leh entertainment industry-ah bung thar kan kai tawh zia leh hnam dang laka kan nep bik toh loh zia entir turin theihtawp chhuahin an inbuatsaih hlawm a ni. Thazual Award performance-te hi Alan Rinawma choreograph niin, Mizo Dance Camp Team member-te'n lamin zaithiam te hi an rawn perform pui dawn bawk a ni.
Thazual Award-a zaithiam zai tur zingah hian tunlai Lengzem hlasatu zinga kan neih that ber pathum - DJ Lalvenhimi, Feli Fanai leh Zorinzuali Khiangte te an tel a. Gospel lamah Amtea, Zorinsanga, Arini leh zaithiam kan hmel hriat thar tur Grace-i te an tel bawk. An ni bakah hian kum engemawzat hnu a rawn intuai thar leh turin Tommy L Pachuau a rawn che bawk dawn a ni.
Performance tin hian theme hran neiin, an lan dan, inchei dan leh lam dan style-te pawh a inang lo theuh dawn. A then hmanlai 60's hunlai inspire a nih laiin, a tunlai thei ang bera che an awm dawn. Ṭhenkhat Egyptian lalnu anga an rawn chet laiin, a then Asylum Hospital atanga rawn chhuak ang ten an rawn perform dawn bawk a ni. Chanmari YMA Hall stage pawh a hranpa a zauh belh a ni a, heta ṭang ringawt pawh hian he show hi a duai dawn lo hle tih a chiang a ni.
Eng an sawi?
Feli Fanai : Tunlai ziathiam lar zinga boruak nei lian ber pawl Feli Fanai chuan, Thazual Award 2017 sem hlan a nghahhleh tawh thu sawiin, inbuatsaihna pawh an neih ṭha tih a sawi. Feli chuan, "Ka hla thar 'Pheichheh mawi I khai ang' tih ka sa dawn a, Mizo Dance Camp-te'n min pui dawn a ni. Zai mai bakah lam leh, Egyptian lalnu anga chetla lai te hmuh tur a awm dawn bawk avangin a dang lam viau ang" tiin an inbuatsaih dan a sawi. Feli Fanai hi Award dawng thei turin Lengzem Category pahnih - Best Female Artist leh Best Music Vedio-ahte a hming chhawp chhuah a ni.
DJ Lalvenhimi : Feli Fanai ang bawka Lengzem Category pahnih - Best Female Artist leh Best Music Vedio dawng thei tura chhawp chhuah, DJ Lalvenhimi chuan inbuatsaihna a neih ṭhat thu a sawi, ṭha taka perform theih a inbeisei. DJ-i chuan, "Opening ka chang dawna ka phur tawh khawp mai, 'Liam mai rawh' tih hla ka sa dawn a, tlema tihdang lam a awm ang. Mizo Dance Camp-te'n minpui dawn a, 1960s kan theme a ni dawn a, a hmuhnawm viau ka beisei" a ti.
Andrew Laltlankima : Kolasib zaithiam Andrew Laltlankima chuan, "Thazual Award sem programme hmang tur hian vawiin hian Kolsib aṭanga lo chhoh ka tum a, Award sem pual liau liau hian Aizawl ka lo chho dawn a ni" tiin a ngaihlut thu a sawi.
Kolasib lama awm mek Grace Lalchhanhimi pawhin Thazual Award semna hun hi tel ngei a duh thu sawiin, "Ka chak khawp mai, mahse hna ṭul kalsan a ngaih dawn avangin ka tel thei kher angem ka hre lo" tiin a sawi.
Thazual Award hi kum 2015 aṭang khat Zonet buatsaihin semchhuah ṭan a ni a, kumin hi a ṭum thumna tur a ni. Category hrang 10 zet a awm dawn a, Gospel leh Lengzem-ahte Category 5 ve ve a awm a ni. Thazual Award 2017 semna programme hi Zonet Zawlbuk leh Zonet HD-ah live-in dar 8:00 atanga pek chhuah a ni ang. Lancy leh Adama-te'n an host dawn a, dar 7 aṭangin Red Carpet a awm bawk ang.
THAZUAL AWARD 2017 NOMINEES (GOSPEL)
BEST FEMALE ARTIST
* Bethsy Lalrinsangi
* Grace Lalchhanhimi
* Hlimhlimi
* Stacy VL Muanpuii
* Temi Sailo
BEST MALE ARTIST
* Amtea
* Andrew Laltlankima
* David Vanlalpeka
* Sawmtea
* TBC Zaithanpuia
BEST NEW ARTIST
* Cindy Lalramhlimawmi
* Cindy Lalthanpuii
* Miriam Lalnundiki
* Sangtei Renza
* Thelma
BEST DUO/GROUP
* Fall Profane
* KTP Electric Matthaia Group
* Mawitei ft Open Strings
* One In Christ
* Seraphic Choir
BEST MUSIC VIDEO
* Adonai's Choir - Ka van in
* Amtea - Ka himing a hria
* Mawitei ft Open Strings - A vul zel
* TBC Zaithanpuia - Zawh ka zuam lo
* One In Christ - Ka Pa Lalram
THAZUAL AWARD 2017 NOMINEES (LENGZEM)
BEST FEMALE ARTIST
* DJ Lalvenhimi
* Feli Fanai
* Mimi Renthlei
* Rachel Lalnunkimi
* Zorinzuali Khiangte
BEST MALE ARTIST
* C. Sanga
* F. Zomuanpuia
* Mathlenga
* Thangromawia
* Thiamchantira
BEST NEW ARTIST
* Aziri
* Grace 10:45
* Kimkima
* Lilzo
* Mercy Remsangmuani
BEST DUO/GROUP
* 7th Strings
* BOG, Hlimhlimi, Ricky Drac, Lil Poor Prince
* C. Sanga & Daduhi
* Casey's Secret
* Ruatpuii Rokhum ft Project Fishtail
BEST MUSIC VIDEO
* Dj Lalvenhimi - Thian rinawm
* Feli Fanai - Pheichheh mawi I khai ang
* Manuna - Duhaisam
* Michelle Varte - Sakhmelthachuang
* Zorinzuali Khiangte ft 135 - Ka ngaihdam che