Avatar-ah Kate Winslet a chang dawn

Kum 2009-a film hlawhtling, dollar tluk­lehdingawn hnih chuang zet laluttu Avatar chhun­zawmna film-ah Kate Winslet a chang dawn - a thawhpui tur hi Titanic film hlawhtling taka lo direct tawhtu James Cameron a ni.

Hollywood director zinga hlawhtling ber pawla chhal ngam Cameron hian kum 1997 khan Titanic film-ah Kate Winslet hi a lo thawhpui tawh a, kum 20 zet hnuah an thawk dun leh dawn tihna a ni - a nghahhlelhawm hle.

Cameron chuan, "Hlawh­tling taka Titanic-a kan thawh dun hnu khan Kate nen hian kum 20 dawn chu kan thawhdunna tur kan lo ngaihtuah tawh a, Titanic kha ka career-a ka hlawhtlinna ber ang hiala ka chhal a nih avangin ani nena kan thawkdun thei leh tur hi ka lawm a. He film-ah hian Ronal lemah a chang dawn a ni," a ti.

Avatar hi 2, 3, 4 leh 5 siam chhunzawm tura ruahmanna siam a ni a, a script hi peih sa vek a ni tawh. Release hun tur pawh ruahman sa vek a ni - Avatar 2 hi December 18, 2020-ah release a ni ang a, December 17, 2021-ah Avatar 3, December 20, 2024-ah Avatar 4 leh December 19, 2025-a Avatar 5 tlangzarh turtein ruahmanna siam a ni.

Cameron leh Jon Landau te chuan Avatar hi an company Lightstorm Entertainment hnuaia an buatsaih tur a ni a, Kate Winslet bakah hian Zoe Saldana, Sam Worthington, Sigourney Weaver, CCH Pounder, leh Stephen Lang-te chu chang tur zinga tihchian tawh niin "Game of Thrones" star Oona Chaplin pawh a chang ve dawn bawk.

Avatar thawnthu hi Cameron bakah Josh Friedman, Rick Jaffa, Amanda Silver leh Shane Salerno-te chuan a script an ziak a ni.