Jennie Kim thlalak leak: SKorea police chhui turin ti

Blackpink member Jennie Kim mimal thlalak leak chungchang chu South Korea Police-te chhui chiang tura tih an ni.

Thlalak leak an sawi hi eng thlalak tak nge tih chiang taka sawi a awm lo a, amaherawhchu Twitter leh Telegram lama Blackpink star Jennie leh BTS V chawhlui kil dun lai thlalak a darh hnu lawkah hemi chungchang thuthar hi hriat tur a awm thung.

Thulengvakah chuan Jennie leh V hi an inngaizawng nia sawi te a awm a, chu erawh chu thudik a nih leh nih loh sawi chian theih a la ni lo.

Blackpink management company YG Entertainment chuan thuchhuah siamin Jennie thlalak leak chungchang chhui chiang turin Police-te an ngen tih an sawi a, Jennie pawhin mimal beihna a tawh bakah mipat hmeichhiat kaihhnawihah vauna a tawk tih an sawi.

"Online-a thlalak inthawn darh kha dan ang taka tlangzarh a ni lo, a mawhphurtu berin eng vang pawha tidarh pawh ni se," tiin thuchhuah an siamah chuan an ziak. Thlalak chu thawn darh zel lo turin fan-te chu an ngen bawk. Thlalak tarlangtu account pahnih chu tihtawp lailawk niin BBC chuan a tarlang.

YG hian eng thlalak tak nge an sawi lang chiah lo a, mahse tunhnaiah Jennie leh V (Kim Tae-hyung) te thlalak dun niawm tak social media-ah a darh nasa hle a ni. Chawhlui an kil dunna thlalak bakah Winnie-The-Pooh t-shirt inang haa an in-selfie laite pawh hmuh tur a awm. Mahse heng thlalakte hi a fiah lo hlawm hle a, an hmel chiang takin a hmuh theih loh a, chuvang chuan fan ṭhenkhat chuan a lem emaw siamchawp emaw a nih an ring.

Big Hit pawhin complaint an thehlut
BTS management company Big Hit Music pawhin complaint thehlut ve bawkin thu dik lo leh thuthang dik tawk lo thehdarh a awm niin an sawi. Eng chungchangah leh eng thlalak chungchang nge a ni tih erawh chiang tawkin an sawi lo thung.

Complaint an thehlut tih bak hi chu nimin thleng kha chuan YG leh Big Hit lam hian thuchhuah engmah an la siam loa, Billboard chuan Blackpink leh YG aiawh thupuangtute pawhin thuchiang engmah an la sawi duh lo niin an tarlang.