Ṭhazual Award 2017 sem a ni ta ; One In Christ leh Feli Fanai-te tan kum ṭha a ni!
Zonet buatsaih 'Thazual Award 2017' chu nizan khan Chanmari YMA Hall-ah sem a ni ta. One In Christ (Gospel) leh Feli Fanai (Lengzem)-te chuan category pahnih-ah Award an dawng a, an tan kum ṭha tih loh phal chi rual a ni lo. One In Christ hian Best DuoṭGroup leh Best Music Video category-ahte Award hi an dawng a ni. Lengzem lamah chuan Feli Fanai-i'n hneh takin ro a rel a, Award ngaihhlut pahnih - Best Female Artist leh Best Music Video Award-te a dawng a ni.
A reh viau emaw kan tih laiin C. Sanga pawhin mipui ngaihlut a la hlawh reng tih rawn nemnghet nawn lehin, Award pahnih a hui ve bawk.
Gospel bikah Hlimhlimi chu 'Best Female Artist' atan thlana a ni a, Sawmte chu 'Best Male Artist' atan thlan a ni. Tlangnuam nula zaithiam, Praise On aṭanga Zoram mipuiin kan hmelhriat Cindy Lalthanpuii chu 'Best New Artist' atan thlan a ni. He category-a chhawpchhuahte hi an theuneu lo hlawm hle a, Cindy Lalramhlimawmi, Miriam Lalnundiki, Sangtei Renza leh Thelma te hming a lang a ni.
Lengzem lamah chuan beisei ang ngeiin Feli Fanai a che na hle a, a pheichheh a khai sual lo! Category pahnih-ah Award dawng thei tura chhawp chhuah niin, 'Best Female Artist' atan thlan a ni. Tun hnaia a tichhuah 'Pheichheh mawi I khai ang' tih chu 'Best Music Video' tan thlan a ni bawk. 'Best Male Artist' Award chu C. Sanga hnenah hlan a ni a, C. Sanga leh Daduhi-te chu 'Best Duo/Group' atan thlan an ni bawk. Hetih lai hian thiam tak mai mai a 'Ka Bialnu ni rawh' tih hla satu Kimkima chu 'Best New Artist' atan thlan a ni bawk.
Award semnaah hian LED screen chhawpchhuah a ni a, programme pawh a changtlung hle. Zaithiam te an che ṭha a, a hmuna kal te leh tv lama lo thlirtute mit a tlung hlein a rinawm. Programme a hlawhtlin theih nan hian, Alan Rinawma leh Mizo Dance Camp (MDC) member dangte an thawh hlawk hle bawk.
Award hi C.Laldinpuia, S. Malsawmtluanga, Hannah Khiangte, T. Zorampela, Robin Lalremruata, Rody H.Vanlalhriatpui, Tea Bawihtlung, C.Vanlalvuana, Lucy Sailo leh Zonuni Fanai-te'n an hlan a ni.
ṬHAZUAL AWARD 2017 (GOSPEL)
BEST FEMALE ARTIST - Hlimhlimi
BEST MALE ARTIST - Sawmtea
BEST NEW ARTIST - Cindy Lalthanpuii
BEST DUO/GROUP - One In Christ
BEST MUSIC VIDEO - One In Christ - Ka Pa Lalram
ṬHAZUAL AWARD 2017 (LENGZEM)
BEST FEMALE ARTIST - Feli Fanai
BEST MALE ARTIST - C.Sanga
BEST NEW ARTIST - Kimkima
BEST DUO/GROUP - C. Sanga & Daduhi
BEST MUSIC VIDEO - Feli Fanai - Pheichheh mawi I khai ang