Ram changkangin Solar power an hmang uar

Ṭhangtharte khawvel ngaihtuah vangin ram changkangte chuan Solar power hman an uar chho deuh deuh a, mahnia rawn insiam thar leh zel thei energy hman nasat kawngah China chu pakhatna niin, a hnungah United States an awm thung. International Energy Agency (IEA) chuan khawvel lum zel tur ven nan leh boruak ṭha lo siam chhuak tam lutuk khawl hman tih tlem a nih theih nan Solar power hi tun aia nasa zawka hman a ṭhat thu an sawi.

International Energy Agency-in an sawi dan chuan nikum chhunga khawvelin power a siam chhuah hmun thuma ṭhena hmun hnih vel deuh tawh chu mahnia rawn insiam leh thei (Renewable energy) an ni a, kum 2022-ah chuan hei ai hian ala pung chho zel thei tura beisei a ni. India pawhin kum 2022 a thlen hunah chuan tuna a hman lai let thawk vek hi solar energy a siam chhuak hman tura ngaih a ni a, beisei anga a hlawhtling a nih chuan UK a khum ang.

IEA executive direc­tor Dr Fatih Birol chuan, "Kum nga lo kal leh turah hian nasa takin solar energy hi hman uar deuh deuh a nih a rin awm a, kan chenna khawvel hi ṭhangthar lo kal leh zel turte tana chenna tlak tura kan hnutchhiah theih nan boruak ti chhe lo leh mahnia rawn indin thar leh zel thei power hman kan chin nasat a ngai a ni," tiin a sawi.