Ṭhazual Award 2017 a hlawhtling

Mizorama 'show' changkang bera chhal ngam - Ṭhazual Award 2017 chu kar kalta Zirtawpni zan khan Chanmari YMA Hall-ah sem a ni.

Zonet leh MDM ṭangkawp­ten an buatsaih Ṭhazual Award 2017-ah hian category hrang hranga Award hi MDM member-te'n an thlanchhuah a ni.

Award te hi Mizo zinga mi chhuanawm tak tak, C. Laldinpuia, S. Mal­­­sawmtluanga, Hannah Khiangte, T. Zorampela, Robin Lalrem­ruata, Rody H. Vanlal­hriatpui, Tea Bawihtlung, C. Vanlalvuana, Lucy Sailo leh Zonuni Fanai-ten an hlan a ni.

Ṭhazual Award 2017-ah hian One In Christ, C. Sanga leh Feli Fanai-te'n Award pahnih ṭheuh an hum haw a, Hlimhlimi, Sawmtea, Cindy Lalthanpuii, Kimkima leh Daduhi-te'n award hi an dawng bawk.

Adama leh Lancy-i ten Award sem programme an kaihruai a, zaithiamte an zai mai piah lamah, an che vel pawh a hmuhnawm. Zaithiamte hian an mahni ṭawiawmtu lam thiam tak tak an nei a, show a tiropui.

DJ Lalvenhim-i'n hot takin bul a rawn ṭan a, Tommy L Pachuau chuan zai chawlhsan mai ala tum lo tih rawn tilangin, a rawn che pui hle bawk. Cindy Lalramhlimawmi perform a hmuhnawm a, Amtea a che turu leh hle. Zorinzuali Khiangte pawhin lamthiamte rawn hruaichhuakin, dangdai leh hmuhnawm takin an che a, mit leh beng an titlai hle. Zorin-a'n MDM member famte pualin hlamawi a sa bawk.

Mipuite hmuh chak leh beisei ang ngeiin Feli Fanai-i'n mak leh danglam takin hnu a rawn khar a, entu mipui a barakhaih chiang hle. Feli hi mipui ṭhutna lam aṭangin dance crew-te'n rawn zawn chhuakin, stage-ah an perform ho nghal a, Mizo Dance Camp (MDC)-te'n talent an neih ṭhat zia an pholang chiang hle.

GOSPEL
Mipa lamah Sawmtea chu Best Male Artist atan thlan a ni. Award dawng thei tura chhawpchuah zingah hian Amtea, Andrew Laltlankima, David Vanlalpeka leh TBC Zaithanpuia te an tel a, Mizoten zaithiam kan neih zingah chuan a ṭha ber ber te an ni. Sawmte hian Ṭhazual Award bakah hian Lelte Award (2016 & 2017) leh Vulmawi Award (2016)-ah Gospel Male Artist Award hi alo dawng tawh bawk.

Gospel bikah hian Best Female Artist atan Armed Veng South nula, H. Vanlalhlimpuii chu thlan a ni a, Award a dawn lai hian Hlimhlim-i hi lawm avangin a biangah mittui a luang. Praise On 2016 aṭanga Mizo mipuiten kan hriat lar Tlangnuam nula Cindy Lalthanpuii chu Best New Artist atan thlan a ni a, tunlai zaithiam zinga hmabak nei eng ber zinga mi a ni.

Cindy hian kuminah official music video pakhat a tichuak tawh a, a hla 'A mawi ber' medley hi Synod Choir conductor pawh ni tawh Mavauna lehlin a ni. Cindy hian Pachhunga University College-ah B.Com a zir mek a, exam zawh lamah music video thar tihchhuah theih a inbeisei.

One In Christ-te'n Best Duo/Group leh Best Music Video an la a, an tan kum ṭha a nih thu kan sawi tawh. Tunah hian member thar an nei a, music video thar pawh an tichhuak leh thuaiin a rinawm. One In Christ-te hian 'Ka Pa Lalram' video mawi leh hmuihnawm dangdai tak hmangin Best Music video Award hi an dawng a ni.

LENGZEM
Ṭhazual Award 2017 sem zawh takah khan lengzem hla satu hmeichhia zingah Feli Fanai chuan Award pahnih dawngin, mipa lamah C.Sanga chuan Award pahnih a hawn bawk.

Mizo mipa zaithiam chhuai thei lo C. Sanga pawhin Award a dawn vangin Zonet leh MDM-te chungah lawmthu a sawi a, a bik takin Best Duo/Group Award andawn theih nana a zaipui, Daduhi leh music video siamsaktu chungah lawmthu a sawi bawk.

Kum naupangte ni chunga Zoram dengchhuak thei, Kimkima chu Best New Artist atan thlan a ni. Kimkima hi 'Ka bialnu ni rawh' tih leh 'Hriat ngai loh Lanu zun' tih hla hmangtein mipuite min awi tawh a, hla thar pawh a tichhuak leh thuaiin a rinawm.

Feli Fanai hian kuimah music video pahnih a tichhuak tawh a, heng a hla te hi Ṭhazual Top char-ah pawh an thleng sang hle. A hla 'Theih chang se' tih hmangin Ṭhazual chart-ah pahnih a hauh a, he mi hnu hian 'Pheichheh mawi I khai ang' tih hmangin pakhatna a hauh leh bawk. 'Pheichheh mawi I khai ang' tih hla hmang hian Hontrade Ṭhazual Top 10-ah pawh ṭum eng emaw zat pakhatna a lo hauh tawh a ni. A music video hi a danglamna piah lamah, a ṭhat tel bawk avangin Best Music Video atan thlan a ni hi a mak hran lo.

Feli chuan, "Award pahnih ka dawng hi ka awih lo lek lek zawk. Zonet chhungkua leh MDM-te chungah ka lawm em em a, ka lawm zia hi sawi fiah vak ngaihna pawh ka hre lo" tiin award a dawn avanga a lawmthu a sawi. Hetih rual hian zai lama amah kaihhruaitu leh, bulṭanpuitu a pa-in a boral san hma lutuk chu pawi a tih thu sawiin, Award a dawn te chu hmuhpui ve se a duh thu a sawi. Award a dawn hi apa tan a hlan thu a sawi bawk.