Nobel Prize 2017 dawng turte hming puan a ni ta

Kumtina sem chhuah ṭhin, khawvel chawimawina sang Nobel Prize dawng turte hming chu puan a ni leh ta a, khawvelin a ngaih hlut Nobel Peace Prize chu Anti-nuclear weapons group, International Campaign to Abolish Nuclear Weapons (ICAN) hnenah hlan a ni dawn.

Nobel committee chuan ICAN hnena Nobel Peace Prize hlan a nih chhan tur tarlangin, "Nuclear-in mihring tana chhiatna a thlen nasat zia te tarlang a, nuclear ralthuam tihtlem a nih theihna tura an hmalakna leh an hnathawh te avangin he chawimawna hi hlan an ni dawn a ni" an ti. Khawvel ralmuanna tichhetu nuclear weapon hrang hrangte chu tihtlem zel a pawimawh thu an tarlang bawk.

ICAN hmalakna avang hian kumin July thla khan ram 122-te chuan nuclear weapon tihtlem an remti a, mahse hei hi nuclear power ram pahnih U.S leh U.K-te chuan an zawm ve lo. Nuclear-armed state-te pawh nuclear weapon hmang tlem hret hret tura ngen an ni bawk.

ICAN hi Switzerland, Ge­neva-a Non-Governmental Orga­nisations (NGO) 100 vel inzawmkhawm pawl a ni a, kum 10 liamta-a din kha a ni. He group hian medal bakah, Swedish kronor million 9 an dawng dawn a ni.

Physics prize chu Rainer Weiss, Barry C. Barish leh Kip S. Thorne-ten an indawn ṭawm dawn a, Laser Interferometer Gravitational-Wave Observatory (LIGO) detector leh gravitational wave lama an thawhhlawk avangin pek an ni dawn. Weiss hi professor a ni a, Thorne leh Barish-te pawh California Institute of Technology-a physicist an ni.

Physics ang bawkin Chemis­try prize pawh mi pathum - Jacques Dubochet, Richard Henderson leh Joachim Frank-te hnenah hlan a ni dawn. Cryo-electron microscopy an tih mai, cancer drug research beihna atan leh Zika virus zirchiana atana ṭangkai tak, atomic scale-a dik leh fel fai taka high-resolution-a thlak theihna hmuchuaktu an ni.

Nobel Prize in Physiology/Medicine chu American scientist pathum - Jeffrey C. Hall (Univer­sity of Maine), Michael Rosbash (Brandeis University) leh Michael W. Young (Rockefeller University)-te hnenah hlan a ni dawn a. British novelist, screenwriter leh short story writer ni bawk Kazuo Ishi­guro chuan Nobel Prize in Literature a dawng bawk ang.

Nobel Peace Prize - International Campaign to Abolish Nuclear Weapons (ICAN)
Nobel Prize in Physics - Rainer Weiss, Barry C. Barish leh Kip S. Thorne
Nobel Prize in Chemistry - Jacques Dubochet, Joachim Frank leh Richard Henderson
Nobel Prize in Physiology or Medicine - Jeffrey C. Hall, Michael Rosbash leh Michael W. Young
Nobel Prize in Literature - Kazuo Ishiguro
Nobel Prize in Economics - Richard Thelar