Billboard album chart-ah Shania Twain

Shania Twain chuan Bill­board 200 album chart-ah pakhatna a hauh a, kar khat chhungin a album hi copy 134,000 zet a hralh a ni.

Shania Twain hian Sep­tember 29 khan a country album 'Now' hi a tichhuak a, chart-ah hian pakhatna a rawn nihpui nghal a ni. A album hi hralh a kal hle a, kumin chhunga album chhuak tawh zing a, kar khat chhunga copy hralh hnem lamah pathumna a ni. Hmeichhia bikah chuan kum thum chhunga album tihchhuah zing a, kar khat chhunga hralh nem ber record a ni nghal bawk. Hei bakah hian tun hnai kum thum chhunga country album tihchhuah zawng zawng zinga chart-a pakhatna hauh thei awm chhun a ni bawk.

'Now' hi Shania Twain-i'n studio album panga a tih­chhuahna a ni a; album a tihchhuah tawhte hi a hit hlawm hle a, Greatest Hits album, Billboard leh Top Country Album-ahte an theng sang vek a ni.

Kum 2015-a a tihchhuah 'Still the One : Live From Las Vegas' chuan Top Country-ah pahnihna a lo hauh tawh bawk a ni. Tuna a tihchhuah 'Now' hi country album zinga kumin chhunga Billboard 200-a pakhatna hauh thei pahnihna a ni bawk.

Hetih lai hian tun hnaia boral ta Tom Petty-a album 'The Heartbreakers' chu hralh a la kal zel a, kar liam ta chhung khan copy 52,000 hralh a ni.

Tom Petty hian chart-ah hian pahnihna a hauh. Demi Lovato chuan 'Tell Me You Love Me' album hmangin pathumna a huah a, pali-naah hian Rapper A Boogie Wit da Hoodie an awm bawk.

Miley Cyrus chu panga-naah awmin, Post Malone, Lil Uzi Vert, Imagine Dragons, Kendrick Lamar leh Ed Sheeran album 'Divide' te chu top 10-ah an lang bawk.