'The Nun 2'-ah Taissa Farmiga inlan leh dawn

Horror film lar tak 'The Nun' chhunzawmnaah Taissa Farmiga chu a chang leh dawn a, Sister Irene lemah bawk a chang leh ang.

Conjuring universe film thar ber turah Farminga a inlan leh dawn tih Variety chuan tarlangin Storm Reid nen an changdun dawn a ni. He film hi nikuma tlangzarh 'The Conjuring: The Devil Made Me Do It' director Michael Chaves chuan a direct dawn a, Akela Cooper chu script ziaktu tur a ni ang. James Wan leh Peter Safran-te pawh he project-ah hian an la inrawlh zel dawn a, producer tur zingah an tel.

'The Nun 2' hi nakkum September 8-ah tlangzarh hman an tum a ni.

The Conjuring universe sawi ang
Horror film franchise eng emaw zat awmna The Conjuring universe-ah hian film pariat lai siam a ni tawh a, chung film pariat-te sum lakluh zawng zawng chu $tluklehdingawn 2 a tling tawh hial.

'The Conjuring'film series line pangngai bakah a spin-off eng emaw zat a awm a, Taissa Farmiga channa 'The Nun' pawh hi chung zinga mi chu niin kum 2018 khan tlangzarh a ni a, $maktaduai 336 lai sum lalutin Conjuring universe film hlawhtling ber a ni mek.

The Conjuring universe hi zauh zel an tum a, The Nun 2 an siam dawn bakah hian 'The Crooked Man' pawh siam tumin hma an la mek bawk a ni.