Mr Rubaru Indian People Choice Award dawngtu Fabian Ralte

Rubaru Mr India 2022 inelna chu Nilaini khan zawhfel a ni a, Mizo zinga he inelna a tel thei hmasa ber Fabian Lalrinpuia chuan top 20 a thlen mai bakah, People's Choice Award a dawng.

He inelnaah hian India ram state leh union territory hrang hrang aṭangin tlangval 35 an tel a, an zing aṭang hian top 20 puanna neih a nih hnuah winner-te puan leh an ni a, Rubaru Mr India 2022 atan Rajasthan tlangval Chena Ram Choudhary chu thlan a ni. Winner hian Mr Globe inelnaah India ai a awh ang.

Rubaru Mr India inelna hi kumin June thla aṭang khan neih ṭan niin, Covid-19 kaihhnawih vangin inelna ṭhenkhat chu online a neih a ni. Finalist-te hian grand finale week chhung chu Chennai-ah offline in inelna an nei a, Grand Finale hi Crowne Plaza hotel, Chennai-ah neih a ni.

Rubaru Mr India 2022-a Mizo tlangval Finalist Fabian Lalrinpuia hian Grand Finale-ah Designer Buanga Chhangte kut chhuak hain, Talent Round-ah Designer MSa Sona kut chhuak a ha thung a, inelna neih chhung hian Mahlui Pearl leh Escape Engmawia-te kut chhuak leh dawr lian Kelvi International leh RC Shirt House-te suit pawh a pholang bawk.

Rubaru Mr India ah hian Fabian Lalrinpuia hnungzui turin kum tin Mizoram aṭangin Finalist tirh tum a ni a, hemi atan hian kumin a Mizoram tana hma la tute chu Amos MS Dawngzuala leh Songashim Rungsung-te an ni.