Vanglaini Biangbiakna ; Combined Competitive Examination-a pakhatna KC Zalena'n UPSC Mains result a nghak mek

September 30, 2022-a Mizoram Combined Competitive Examination-a pakhatna KC Zalena chu Vanglaini in biangbiakna neiin Union Public Service Commission Mains exam result a nghah mek thu a sawi.

KC Zalena hian college a kal lai aṭangin Civil Service lama luh hi a tum tawh a, UPSC prelims phei chu vawi li lai paltlang tawhin MCS ni tawh dawn mah se UPSC exam chu a la tum zel tih Vanglaini a hrilh. MCS hi vawi hnih a exam tawh a, mains chu a vawi khat tlinna a ni thung. "Pakhatna hi chu ka nih ka beisei bik lo a, mahse tlin ngei erawh ka inring," tiin KC Zalena chuan a sawi a ni.

Ni tin darkar 7-8 lehkha a zir ṭhin a, zanreh lam chu a tan chuan lehkha zirna hun ṭha leh nuam ber niin a hria. UPSC leh MPSC atana inbuatsaih chu syllabus inang deuh reng ni si, a exam erawh thil danglam tak nia a hriat thu a sawi a, MPSC a hmachhawn dawn hian syllabus in ang deuh reng chu mahniin Mizoram exam mila her danglam/siam rem thiam a ngai a ti bawk. MPSC hna lak erawh a fair tawk viauin a hria. Kca hian Mains-a optional-ah Poltical Science a la a ni.

Exam tura a inbuatsaih lai hian kohhran leh khawtlangah a inhmang lo tih a sawi a, mahse a inkhawm zeuh zeuh thu a sawi thung. A inbuatsaih laiin social media a hmang lo a, ngaihzawng pawh a nei lo tih a sawi bawk.

Inbuatsaihna atan Vanglaini chanchinbu a hmang ṭangkai em tih zawhna chu chhangin,"Mizoramah chuan a ṭha berin ka hria, Mizorama exam hrang hrang atan a ṭangkai hle a ni," tiin a sawi.

Chhaolo tlangval KC Zalena chuan competitive exam bei mekte chu tha thlah loa bei fan fan tura a duh thu a sawi a, tha thlah loa zir hi a pawimawh em em a ni a ti. Hna siam belhna turin Industry chu Mizoram hmasawnna tur atana pawimawh nia a hriat thu a sawi bawk a ni.

Tu nge KC Zalena chu?
Chhaolo, Siaha district-a cheng niin KC Lalduhsanga leh NT Tluaki-te fa pali zinga a upa ber dawttu a ni. U mipa a neih bakah nau hmeichhe pahnih a nei a, Evangelical Church of Maraland kohhranah an lawi. Football en chu a nuam tihzawng niin Manchester United fan a ni a, Chess a tui hle bawk. Cristiano Ronaldo leh Albert Einstein-te chu a mi ngaihsan zinga mite an ni.

Delhi Technological University (computer engineering) aṭanga zirchhuak niin HSLC-ah Mizoram pumah pariatna a ni a, HSSLC-ah Science stream aṭangin parukna a ni bawk.

Hna exam tura inbuatsaihna atana pawimawh a tihte:-
- Mahnia note mumal tak neih
- Ennawn peih
- Answer writing practice hnem