Grand Vitara Mizoramah lei theihin a awm ta

Grand Vitara chu nimin khan NEXA Aizawl, Ṭhuampui GIG Motors-ah Mizorama lei theih turin tlangzarh a ni.

Grand Vitara thar tlangzarh inkhawmah hi Angelina Paul chuan kaihhruaiin MZU hnuaia Graduate topper- Lalruatsanga (PUC), Lalparvuli (GZRSC), Lalmalsawmi (HBC) leh Lalremkimi (GZRSC)-te chu khuallian an ni a, Human Resource & Development Board vice chairman L Thangmawia chu khual zahawm a ni thung.

Product review-tu Bch-a (The Aizawl Post) chuan Grand Vitara chi hnih- Mild Hybrid leh Strong Hybrid a awm thu sawiin Strong Hybrid chu India mite'n an ngaihven zawk a nih thu a sawi. Petrol bakah battery hmang telin, petrol, a engine leh battery ṭangkawp vek thei a nih avangin a chak hle a ni, a tia, petrol hmang loin, electric hmangin eng emaw chen a tlan theih thu a sawi bawk.

"Model ṭhenkhatah chuan four wheel drive a awm. Battery pawh charge hran ngai loin amah leh amah a lo incharge mai thei a, regenerative braking system hmangin a charge thei bawk," a ti.

India rama ngaihven a hlawh chhan chu petrol a heh loh vang niin a sawi a, 15 kmph vela tlan chuan petrol hmang loin a tlan thei a, a tlan chak hnuah automatic-in petrol a hman chauh thu a sawi bawk.

Grand Vitara hi model hrang hrang awmin showroom price-ah chuan Cheng nuai 10.45 aṭanga Cheng nuai 19.65 man vel thlengin a awm a, mi hrang hrang ngaihdan an lakah a man nen pawh he motor thar hi a inphu viau a ni.

NEXA Aizawl hian khualliana an sawmte hnenah hian pangpar bouquet leh an lehkhabu leina tur an pe a, tin Grand Vitara Mizorama lei hmasa bertu hnenah pangpar bouquet leh chahbi hlanna an nei nghal bawk.