Tori Kelly zaipui turin Lovato-i'n hma la

Demi Lovato chuan a manager Scooter Braun chu  Tori Kelly nen an 'collaborate' theihna tura hma la turin a ti.

Tori Kelly hian inkharkhip chhungin Instagram a hmang ṭangkai a, live pawh a uar hle. Thawhlehni pawh khan Demi Lovato hian Tori Kelly live hi a zawm ve nghe nghe a, kum 2016-a Lovato hla tihchhuah 'Stone Cold' chu a hangin an sa dun a, lo thlirtute lawm an hlawh hle.

An live zawh hnu hian Lovato hian Kelly hi a fak zui a, a manager Scooter chu an zai dun theih ngeina tura hma la turin a ngen zui a, studio a Kelly hun hmanpui a chak hle a ni.

"Tun chhuan kal mekah hian zai thiam ber zinga mi a ni a, nang nena eng emaw tihdun thei hi a hlu hle dawn a ni," tiin Lovato chuan Kelly hnenah a sawi a, Tori pawh hian chutiang rilru chiah chu a put ve thuin a chhang.

Demi Lovato hi hun eng emaw chen a talbuai hnuah kumin chu rawn 'comeback' a tum nasa hle a, Tori Kelly nena zai dun a chak thu hi a hma pawhin a lo sawi tawh a ni.

Tori Kelly hi IG-ah tunhnaiah a live nasa hle a, a fan-te hla thlansak sa ṭhinin, John Mayer 'Slow dancing In a burning room' a cover chu John Mayer fan-te'n an lawm hle. For King & Country leh Kirk Franklin-te nen thawhhoin 'Together' music video an tichhuak hlim hlawt bawk a, tunlaiin boruak a nei lian hle.