Asia Pacific Choir Games 2017

Shillong Chamber Choir Soloist Ibarisha Lyngdoh-i chu 4th Asia Pacific Choir Games & Grand Prix of Nations Colombo 2017-ah judge tura sawm a ni. Asia Pacific Choir Games hi October 21 aṭangin Colombo-ah ṭan a ni dawn a, ni riat chhung a awh dawn a ni. Tun hi South Asia-a nghah a nih ṭumkhatna tur a ni bawk.

A buatsaihtu INTERKULTUR organi­sation chuan Shillong Chamber Choir Soloist Ibarisha Lyngdoh-i, judge atan sawm a nih thu hi tun hnai khan an puang. Lyngdoh chuan, “Sawmna duhawm tak a ni a, hnar phal chi rual a ni lo. Ka career-a hun ropui tak tur a ni dawn a, ka phur tawh tak zet a ni" a ti. Hlawkpui ngei a inbeisei thu a sawi. Kum 24 mi Ibarisha Lyngdoh hian hnuhma ṭha tak a lo nei tawh a, Shillong Chamber Choir-te US President Barack Obama hmaa an zaiṭum khan a lo tel tawh a ni. Lyngdoh hi India aiawha judge tura sawm awm chhun a ni a, Britain, Norway, US, South Africa, New Zealand, Singapore, China, Indonesia, Myanmar leh Philippines aṭangtein judge tur hi sawm an ni bawk.

He hunah hian ram hrang hrang aṭangin music lama hnuhma nei ṭha tak tak an fuankhawm dawn a, cultural & tradition workshop leh seminar buatsaih a ni ang. Hei bakah hian concert leh events hrang hrang buatsaih a ni dawn bawk.

Asia Pacific Choir Games-ah hian India aṭangin - KC Lights (Meghalaya), Nagaland Chamber Choir (Nagaland), Ao Naga Choir (Nagaland), Mizo Cardinal Choir (Mizoram), Salvation Singers (Mumbai), Beat Choir, Madras Musical Association Choir leh Sargam Choir (Chennai)-te an zai dawn a ni.

INTERKULTUR hian kum 1988 aṭang khan khawvel huap international choir competition leh festival hi an buatsaih ṭan tawh a, ram hrang hrangah nghah ṭhin a ni. Tun ṭumah hian INTERKULTUR hian, Colombo Cultural Hub Trust, Sri Lanka Tourism Promotion Bureau leh Sri Lanka global ten Dilmah-te thawhpuiin an buatsaih dawn a ni.