November-ah Aizawl FC film siam ṭan dawn
Mizo club Aizawl FC-in I League nomawi an chawi dan chanchin ngaihnawm film a siam tur chu hmalak chhoh mek zel a ni a, rei loteah film-a chantir a ni thuai dawn.
Aizawl FC hian he film produce tur hian Bollywood producer Tarun Rathi (Rajnanidhi Entertainment Limited) chu inremna an lo neihpui tawh a, he film direct tur leh script ziak turin Bollywood film Pardes, Apnes leh Right Yaa Wrong-a director lo ni tawh Neeraj Pathak chu inremna neihpui a ni leh ta.
Nilaini khan JW Marriot Hotel, Juhu Beach-ah he film chungchanga hmalakna neih dan tur sawihona chu Aizawl FC president Robert Romawia Royte hoin Tarun Rathi leh Neeraj Pathak te hian an nei a, November kar hmasa berah he film buaipui hna thawk ṭan tur hian ruahmanna an siam a ni.
Robert Romawia Royte chuan, "Bollywood-a hming langsar te inlanna tur a nih dawn avangin a siam a hautak dawn a, chutihrual chuan Mizoram chhunga kan film star neihte tan pawh hun ṭha hawn kan tum a ni," a ti.
He film thawnthu ziak tur Neeraj Pathak chuan, "Aizawl FC-in rin hlawh lo chunga I League nomawi an chawi dan ngaihnawm hi khawvelin a hriat ve a ṭul a, India mai ni lo ram pawn thlengin a lar theih kan beisei," tiin beiseina an neih san thu a sawi.