India film industry-in Covid-19 vangin $mtd 330 hloh tling mai thei : Report
Hripui leng vangin khawvel hmun hrang hrangah inkharkhip kalpui a ni a, entertainment khawvel pawh a nghawng nasa hle. India film industry pawh a zuah bik lo a, entertaiment khawvel a kal pangngaia a kal leh hunah pawh hun eng emaw chen chu ngai a awh rih dawn lo tih a chiang a, lemchan thiamte pawh an hlawh tihtlem a ngai hial mai thei.
CNN chuan trade analyst Komal Nahta thusawi tarlangin theatre hrang hrang hawn a nih leh hunah pawh a pangngai anga hawn lehnghal a ngamawm dawn lo a, social distancing kalpui a la ngaih dawn tho avangin hei hian nghawng a nei lian dawn hle.
India film industry bik chuan $maktaduai 330 a hloh thei dawn niin trade analyst chuan a chhut a, hei hi India pawisa chuan Rs vbc 2500 lai a ni a, sum hloh hi a tam dawn tak zet a ni. Nahta chuan China theatre entirna atana hmangin, China anga social distancing kalpui reng chunga ticket zawrh a nih chuan seat pakhat dahawl zel a ngai dawn a, ticket 50% chiah an hralh thei dawn tihna niin, film budget tam tham tak phuhrukna atan chuan a hautak dawn hle a ni, a ti.
India film industry innghahna ber chu tualchhung box office ni mah se khawvel pum huapa lar star an awm ve nual avangin Nahta chuan khawvel puma theatre-te hawn a nih loh chuan India film industry chuan hlawkna a nei thei dawn lo tih a sawi. Bollywood star langsar zual Shah Rukh Khan, Akshay Kumar leh Deepika Padukone-te ang channa film chuan khawvel hmun hrang hrang aṭangin sum an hailut ṭhin tih a sawi a, ramdang aṭanga sum hai luh hi a tam tham ṭhin hle tih a sawi bawk.
Trade analyst chuan lemchan thiam lar tak takte hlawh chu tihtlem a ngai ngei dawn tih a sawi a, top actor-te piah lamah hian camera-a lang ve lem lo crew-te hlawh pawh a nghawng nasa dawn hle a ni, a ti. Mahse India ram bikah chuan movie budget tam ber hi achangtute zirin a tamin a tlem ṭhin niin a sawi.
Hrileng vang hian film 'hit' tura ngaih Sooryavanshi leh ‘83-te chu tiam chin awm loin tihchhuah hun tihkhawtlai a ni tawh. Hmanni lawka thi ta Irrfan Khan-a film chan hnuhnung ber Angrezi Medium pawh beisei angin a 'hit' hman lo a, inkharkhip vangin a sum lakluh tur ang a hloh nasa hle. Alia Bhatt pawhin Mumbai-a a shooting neih tur ṭhulh lailawk a ni tawh bawk.