Las Vegas-a inkahna thlen hnuah Jason Aldean-a'n Tour nei ṭan leh
Country star Jason Aldean chuan Las Vegas-a inkahna rapthlak tak a thlen hnuah, Ningani aṭang khan tour a nei ṭan leh.
Jason Aldean hian October 4 khan Las Vegas-a, Mandalay Bay hotel bulah concert a nei a, stage-a a perform laiin silai hmehpuah a ni a, mi 58 an thih bakah midang 500 velin hliam an tuar a ni. He thil thleng hi US chanchina inkahna thleng tawh zinga rapthlak bera ngaih a ni. Jason Aldean hian he thil hleng vang hian tour a neih pawh a titawp lailawk a, California, Los Angeles, San Diego, Anaheim leh California-a a concert tur pawh a cancel a ni. Mahse Ningani aṭang khan Tulsa-ah tour hi a ṭan leh tawh a ni.
Jason Aldean leh a nupui, Brittany Kerr-te chuan Las Vegas-a inkahna thlenna hmun pawh an tlawh a, nunna chante zahna an hlan. Hei bakah hian Las Vegas hospital-ah kalin, he inkahna thleng avanga hliam tuarte an kan kual a ni.
Pawikhawihna rapthlak tak thlentu Stephen Paddock hian Music festival chhimtute hi festival neihna bul, Mandalay Bay Hotel chhawng 32-na aṭangin a kap a ni. Paddock hi kahhlum ve nghal a ni a, a awmna room-ah hian silai 23 hmuh a ni. IS firfiak pawl chuan Las Vegas-a pawikhawihna hi an pawl thlen niin an sawi a, Paddock hian thla eng emaw zat liamtaah khan Islam sakhua a zawm niin an sawi bawk.