India-ah Wiz Khalifa a perform dawn

Rapper Wiz Khalifa chu India ramah a rawn kal dawn a, Goa-a music festival neih turah a perform dawn a ni.

Goa-ah hian December thla khian multi-genre music festival 'Time Out 72' buatsaih a ni dawn a, Wiz Khalifa a tel tur thu puan a nih aṭangin ngaihven a hlawh nghal hle. Wiz Khalifa chuan hemi chungchang hi tarlangin, “Hey India... lo kal ka chak tawh tak zet a ni. Ka fan-te lo inring rawh u, Time Out 72-ah kan inhmu dawn nia" tiin a phur tawh thu a tarlang. Khalifa hi multi-platinum recording artist Jason Derulo leh DJ lar Martin Garrix-te pawhin an rawn zui dawn a ni awm e.

Time Out 72 founder Vaishal Shah chuan, "Festival-ah hian kum dangah chuan hip hop leh rap lamte telh a ni ngai meuh lo a, tunah erawh chuan ruahmanna dang kan siam ta a ni. Khalifa hi kan chahluh duh ber chu a ni a, India-ah a vawi khatna atana kan chahlut thei tur hi kan lawm tak zet a ni" a ti.

Kum 29 mi Khalifa hian solo album paruk a tichhuak tawh a, a hla sak zingah ‘Black and Yellow’, ‘Payphone and Young’ leh ‘Wild & Free’ tih hla te chu kan hre lar viau. Charlie Puth nena an sak Fast & Furious 7, original soun track 'See You Again' phei chu a hit hle a, youtube-ah viewer 3,154,608,969 zet an awm tawh a ni. Khalifa hian The Weeknd, Maroon 5 leh Fall Out Boy-te pawh hlawhtling takin a lo thawhpui tawh bawk.

Waterlemon Events LLP leh Sudarshan Entertainment World ṭang kawpten an buatsaih festival hian ni thum chhung a awh dawn a, December 27-ah ṭan a ni ang.