Oscars Academy member aṭangin Harvey Weinstein ban

Academy of Mo­tion Pictures Arts and Sciences chuan Holly­wood producer Harvey Weinstein chu mipat hmeichhiatna lama a hmingchhiat avangin Oscars Academy member a nihna aṭangin a ban.

Oscars Academy-ah hian Board of Governor hi mi 54 an awm a, Harvey Weinstein hi chung zinga pakhat chu a ni. Mahse tun hnaiah hmingchhiatna lian tak a nei a, US leh UK police-te chuan man tumin an zawng mek a ni. Kar kalta Inrinni khan emergency session-ah a chungchang hi ngaihtuah a ni a, member a nihna hlih sak turin thutlukna siam a ni ta a ni.

The New York Times leh The New Yorker magazine-te chuan tun hnai khan Weinstein-a hmingchhiatnate an rawn tarlang a, a chanchin hian ngaihven a hlawh chho ta a ni. Weinstein hian kum 1990-2015 inkar khan hmeichhia eng emaw zat a khuaikhem nia tarlan a ni.

Weinstein bakah hian comedian Bill Cosby chu mipat hmeichhiatna lamah hminghliauna a neih avangin member a nihna hlih sak a lo ni tawh a. Mi langsar tak tak, European director Roman Polanski leh Mel Gibson te pawh ban an lo ni tawh bawk.