Feli Fanai pheichheh a khai mawi ber

Ṭhazual Award sem zawh taka 'Best Female Artist' leh 'Best Music Video' dawng kawp thei, Feli Fanai chuan Hontrade Ṭhazual Lengzem-ah pakhatna a hauh. 'Pheichheh mawi I khai ang aw' a tlangzarh hnua pakhatna a nih ṭum khatna a ni.

Feli Fanai hian 'Pheichheh mawi I khai ang aw' tih music video hi August thla khan a tlangzarh a, Ṭha­zual Lengzem-ah pawh top 10-ah a inhlangkai rang hle. Chart-ah hian pahnihna a lo hauh tawh a, hma sawn zelin tunah chuan pakhatna a ni ta a ni. Zorinzuali Khiangte chu pakhatna aṭangin pahnihna-ah a tla thla ve thung a, DJ Lalvenhimi chu a dinhmun ngai, pathumna-ah a la awm bawk. Feli, Zorini leh DJ-i te hian top chart-ah a ber nihna an inhauh chhawk zak zak a, tun ṭumah pawh a sang pathum an ni leh.

DJ-i hla 'Ka tan I chuai' tih hi a hla a nalh piah lamah, a music video a hmuhnawm avangin hun eng emaw chen chu chart-ah a la langin a rinawm. Zorini pawhin 'Lunglen a na' tih hla hmangin chart-ah hmun pawimawh a chang zui zel a, a sang zingah a la lang zui zel a nih pawhin a mak lo ang.

Ṭhazual Award dawng hlim Feli Fanai pawhin hmun sang ber a luah zui zel a nih pawhin a mak lo ang. Tunlai ziathiam zinga mite ngaihven leh boruak nei lian ber zinga mi a ni tlat. Feli hian tun thla tawp lam hian Delhi a pan dawn a, Delhi Mizoten kut an buatsaih turah a zai dawn a ni.

Tun ṭum top chart-ah hian thil a danglam tam lo a, F. Zomuanpuia-a'n a dinhmun ngai, pali-na hauh lehin, pasarihna ṭangin pangana-ah Sangkimi Khiangte a rawn invawrh chho thung. Hetih lai hian Mathlenga a hnungtawlh ve thung a, pangana aṭangin paruknaah a tla thla a, Sumeon Khiangte pawh pakuana-ah a chhuk. Henry Lalmalsawma Renthlei pawh 'Run hmun leng ila' ti chung zelin top chart-ah a la inhamtang ve bawk.