Salvation Army-te'n 'Others Week' hmang mek

Salvation Army ṭha­lai, SAY-te chuan nimin aṭang khan midangte ṭan­puina hun 'Others Week' an hmang ṭan a, Pathinni thleng a awh ang. Hei hi Territorial Staff Song­sters, Territorial Staff Band, Central North Di­vision Songsters leh Central South Division Songsters-te bultuma neih a ni.

A buatsaihtute hian Thawhṭanni zing kar khan Aizawl khawpui chhunga sumo counter hrang hrangte an tlawh kual a, passenger-te chu prayer card pein, an tan an ṭawngtaisak. Passenger-te chu an thawmhnaw te an theih ang anga hlanpuiin hun an hmang a ni. Songsters leh Band-te hi hmun hrang hrangah an insem darh a ni.

Vawiin hian Aizawl Bazar Corps-ah Blood Donation camp an buatsaih leh dawn a, a duh apiang tel turin an sawm. Ningani aṭangin ṭhenawm khawvengte electric bill, tui bill leh phone bill peksakna hun an hmang leh ang a, 'thank you card' an semchhuak dawn bawk. Ruahman dan chuan

Ningani khian Salem veng Anganwadi centre rawng hnawih ṭhat sak hnatlang an nei dawn a, Zirtawpni zanah Bazar hmun hrang hranga ṭhute ṭanpuina hun an hmang leh bawk ang. He hunah hian a ṭul dan angin bungruate an thiarpui dawn a, eitur an sem nghal bawk ang.

Inrinni khian Salem vengah kum upa lam tan free clinic an buatsaih dawn a, hemi rual hian Officer Training College campus-ah hun an hmang bawk ang.

Pathianni chawhnu dar 2:30-ah Dinthar kawnah mual inkhawm an nei ang a, 'Others Week' kharna hi neih nghal a ni ang.