Box Office-ah Happy Death Day a rawn lang
Box office tihchhuah thar berah Happy Death Day a rawn lang a, kar hmasa lama pakhatnaa awm Blade Runner 2049 a rawn khum. Horror film 'Happy Death Day' hian tlangzarh a nih karah $mtd 26.5 lalutin pakhatna a hauh.
He film hi Christopher Landon-a direct niin, a kutchhuak zingah kumin chhunga Box Office-a pakhatna hauh thei pathumna a ni. A hmain 'Split' leh 'Get Out' te chuan tlangzarh karah pakhatna dinhmun hi an lo luah tawh bawk. Happy Death Day hian sum a lakluh tawh zawng zawng chu $mtd 31.5 a tling tawh a ni.
Blade Runner 2049 chuan $mtd 15.1 lalutin pahnihna a luah a, kar hmalam nena a sum lakluh tawh zat hi $mtd 60.6 a tling tawh a ni. Khawvel hmun hrang hrang aṭanga a lakluh zawng zawng belhkhawm chu $mtd 158.6 lai a tling tawh bawk. The Foreigner chu sum lalut tam pathumna niin, kar liamta chhung khan $mtd 12.8 zet a hui lut. He film siam nan hian $mtd 35 zet sen a ni a, a sum lakluh tawh zawng zawng chu $mtd 88 a ni.
Sum lalut tam zingah "It" a lang leh a, Kate Winslet leh Idris Elba te channa The Mountain Between Us chu sum lalut tam zingah a tel bawk.
Box Office
1. Happy Death Day - $26.5 million
2. Blade Runner 2049 - $15.1 million
3. The Foreigner - $12.8 million
4. It - $6.1 million
5. The Mountain Between Us - $5.7 million
6. American Made - $5.4 million
7. Kingsman: The Golden Circle - $5.3 million
8. The Lego Ninjago Movie - $4.3 million
9. My Little Pony: The Movie - $4 million
10. Victoria & Abdul - $3.1 million