Joe Jonas leh Sophie-te an inhual ta

Joe Jonas leh a tawih Sophie Turner te chuan in­hual zungbun an bun chu instagram lamah an tarlang.

American pop band 'The Jonas Brothers' aṭanga lar chho Joe Jonas leh Game of Thrones actress Sophie Turner te hi kum 2016 aṭang khan an inzui ṭan a, tunah chuan inzui satliah mai an duh tawk ta lo a ni. An inneih hun tur erawh tarlan a ni lo a, a hun erawh a hla vakin a rinawm loh.

British actress Turner leh Jonas te hian instagram lamah diamond ring an bun lai hi an phochhuak a, engmah zep tur a awm tawh lo tih an nemnghet ta a ni. Anmahni ngaihventute an rawn lang nghal a, nupa hlim leh inkawp rem tak ni turin duhsakna an hlan. The Jonas Brothers chuan an member Joe Jonas leh a kawppui Turner te chu duhsakna an hlan thu an tarlang a, Jonas-a unaupa Nick Jonas pawhin,"Ka unaupa ka lawmpui a che, ka hmangaih che u" tiin a tweet. Duhsakna hlantu zingah hian Demi Lo­vato leh Selena Gomez bakah mi lar eng emaw zat an tel a ni.

Joe Jonas hian kum 28-na a hmang mek a, Bristish actress chhelo Turner erawh kum 21 mi chauh a la ni.