Kanye West IG account tihtawpsak

Kanye West chu Instagram policy a bawhchhiat avangin a account an tihtawp lailawk sak.

Meta thupuangtu chuan Kanye Instagram account aṭanga a post chu an lakthlak sak nghal tih sawiin, hemi chungchanga post a siam dan kimchang erawh sawilang loin, an social platform policy zawm lo account-te chu an hrem zel tur thu a sawi.

Kanye chuan Instagram neitu Mark Zuckerberg chu Twitter-ah sawisel zuiin, tunhnaia Twitter lei tum nia an sawi Elon Musk chuan, "Ka ṭhian Twitter-ah ka lo lawm leh a che," tiin West chu Twitter lamah a lawmlut nghal.

West leh Diddy-te chu Instagram lama an inchhanna lamah West hian Juda mite huat zawng taka a ṭawng chhuah avangin sawi hi tawkin, a hnu lawkah post hi an la thla nghal a ni.

Advocacy pawl American Jewish Committee chuan Zirtawpni khan inthliarna lam hawi leh Juda sakhua sawisel zawnga post a siam avangin West chu an dem thu an tarlang. West hian ṭawngkam mak tak tak a lo chhakchhuak fo tawh a, The Daily Show host Trevor Noah chu a sawichhiat avangin darkar 24 chhung a account tihtawp a ni tawh a, kumin February thla khan a nupui hlui Kim Kardashian leh a hunlaia a bialpa Pete Davidson inzuilai thlalakte chu amah tibuaitu leh zar buaitu mai an nih thu sawiin, hei pawh hi a delete leh nghal a ni.