Liverpool khawpuiin 2023 Eurovision Song Contest thleng dawn

2023 Eurovision Song Contest chu England hmarlama Liverpool khawpuiin, Ukraine aiawhin a thleng dawn.

Eurovision contest hi an tihdan phungah chuan pakhatna dawngtu ramtin a kum lehah an thleng ṭhin. Kumin contest-ah Kalush Orchestra, Ukraine chu pakhatna ni mah se, an rama indona thleng mek avangin runners-up Britain chu nakkuma thleng turin sawm an ni tih European Broadcasting Union chuan a sawi. Britain hian kum 1998 khan a lo thleng tawh a ni.

2023 Eurovision hi BBC hi a buaipui dawn a, competition grand final-ah 2022 winner Ukraine chu automatic-in a tling nghal bawk.

Eurovision 2022 winner Kalush Orchestra chuan thuchhuah siam nghalin, Liverpool khawpuiin Eurovision 2023 a thleng tur chu lawmawm an tih thu an sawi. 'The Beatles' ho bul ṭanna hmuna hun an hmang thei tur chuan an tana hun chhinchhiah tlak a ni dawn tih an sawi. Kalush Orchestra hian an winner trophy lak lilamin, heta ṭanga an sum hmuh USD 7,39,000 chu Ukraine mipuite chhawmdawlna atan an hlan vek a ni.