Canada-ah vur hmun a tuiral chak
University of California-in a zirchiannaah, Canada hmar lama vur khâwn leh vur hmunte a let tam takin a tuiral chak ta zawk tih hmuhchhuah a ni.
University of California-in Canada ram hmar lam, Queen Elizabeth Islands-a vur awmdan an zirchianna aṭangin kum 2005 ai khan tunah chuan za zela 900% ngawtin vur khâwn (glacier) leh vur hmun (ice cap)-te chu an tuiral chak tawh zawk a ni. Queen Elizabeth Islands-a vur khâwn leh vur hmunin ram a khuh zau zawng hi square kilometre 105,000 zet a ni.
Queen Elizabeth Islands-ah hian kum 1991 aṭanga kum 2005 chhunga kum tin vur tuiral zat nia zirchiannain a tarlan chu ton tluklehdingawn thum a ni. Kum 2005 aṭanga kum 2014 chhung khan a hma aia nasa fein vur a tuiral ta a, a tuiral tam zawng hi kum khat chhungin ton tluklehdingawn 30 (gigaton 30) lai a tling a ni.
Environmental Research Letters journal-a zirchianna an tarlanah chuan, "Kum 2005 hma lam kha chuan vur tuiral dan hi a la hniam hle a, kum 2005 hnu lam aṭang erawh chuan namen loa chakin vur hi a tuiral ta a ni. Queen Elizabeth Islands hi tunah chuan tuipui chîm chin tisangtu lian tak a tling tawh a ni," tih a ni.
University of California-a mithiamte zirchiannaah chuan, kum 2005 hma lama vur a tuiral dan ber chu vur khâwn kehdarh avang te, vur tlang kehdarh vangte a ni a, a tuiral dan pawh a rual khai hle. Hei hi khuarel anga vur tlang leh vur khâwnte a tuiral dan a ni. Tunah erawh chuan vur a tuiral dan zaa 90 zet chu vur pang leh pawnlang tui vang a ni a, chumi awmzia chu khawvel lum zelin a nghawng liau liau a ni ber a, khuarel piah lam a ni tawh a ni.
Zirchiangtute hian zirchianna atan hian kum 1991-2005 chhunga satellite aṭanga thlalak leh, NASA hnuaia Operation IceBridge-in data an lo neih tawhte aṭangin a ni. Hei bakah hian kum 25 chhunga vur pawnlang tuiral dan chhut nan hian Climate Model an hmang bawk.