Khiangte Construction Ṭhazual Lengzem ; Lowdy ft Francis 'Damchhung' pakhatna

Khiangte Construction Ṭhazual Lengzem-ah chart hnuhnung bera pahnihna Lowdy ft Francis 'Damchhung' chu pakhatnaah a rawn inhlangkai. He hla hi Francis, Bena leh Lowdy-te thawkhoina an phuah niin production pawh Lowdy kutchhuak hi a ni. Visual hi JonMizo kutchhuak niin recording chu Westend Studio(Tluanga Hnamte)-ah tih a ni. Kumina an album tihchhuah tur 'SIPAITE' a an hla zinga mi niin, Youtube lamah pawh thlirtu an pung chak sawt hle.

Feli Fanai,Michelle Varte leh Zaii Hauchhum 'Ka tan i mawi' pawhin hma rawn sawnin palina aṭangin pahnihnaah a rawn chho a, Lalropuii Pachuau hla 'Boxer with Crocs' pawh pasarihna aṭangin pathumnaah a rawn inhlangkai a ni.

Ṭhazual top 10-ah hian hla thar mawi tak tak a awm nual a, Lawmi Chhakchhuak 'Tah ruai ka nuam', F. Zomuanpuia 'Valrianga Thinlai', KR Robert ft Tuaisiala 'Millionaire fanu', Asangi GT 'Chantir rawh', Zorinzuali ft Gnie 'Ka Saltanna' te chu top-10 a hming thar rawn lang te an ni.