Asia Pacific Choir Games-ah Mizo Cardinal Choir an tel dawn
Mizo Cardinal Choir chu Asia Pacific Choir Games & Grand Prix of Nations Colombo 2017-ah an tel dawn a, vawiin hian Colombo panin Lengpui Airport an chhuahsan ang.
Asia Pacific Choir Games hi a ṭum lina tur a ni a, Colombo, Sri Lanka-ah neih tur a ni. He competition-ah hian khawvel ram hrang hrang atangin zaipawl 73 chuang tel tura beisei an ni. India aṭangin zaipawl 8 an tel dawn a, category hrang hrangah an inlan dawn a ni. He Choir Games-ah hian category 10 (vocal Ensembles, sacred music, traditional, children choir, etc) a awm ang. Mizo Cardinal Choir te hi "Vocal Ensembles" category-ah an tel dawn a ni.
Mizo Cardinal Choir-te hi Delhi-a United4Good-te'n tel tlakah ngaiin an rawn thlang a ni. A buatsaihtu INTERKULTUR-a Indian representative leh United4Good member, Shillong Chamber Choir pawh lo buaipui tawh, Ike Singha chuan Mizo Cardinal Choir-te an tel theih nan hian hma a la a, Chief Minister Office leh a hnuaia department-te'n Mizo Cardinal Choir kalna tur leh kal dan turte an ruahmanpui a ni.
Mizo Cardinal Choir-te hi Competition-a an tel bakah, opening concert leh closing concert-ahte an perform dawn a ni. Hei bakah hian organizer leh Sri Lanka sorkar ṭangkawp buatsaih, Sri Lanka Prime Minister chenna ina Asian Celebration Gala neih turah, Prime Minister leh India High Commissioner-te hmaah an zai bawk ang. He programme-ah hian Kristian heritage an pholang dawn a, inbuatsaihna pawh an nei ngawrh hle.
Asia Pacific Choir Games-ah hian hla duh duh a sak ngawt theih lova, a buatsaihtute duh ang thlap a nih a ngai a, an hla sak tur pawh staff-notation nena submit thlap a ngaih bakah, a phuahtu/siamtute phalna te neih thlap a ngai bawk.
Mizo Cardinal Choir hian he competition bakah hian an telna tur programme hrang hrangah Mizo hlado te, hla pui te, English leh Latin hlate an sa dawn a ni.
October 21 aṭanga ṭan tur 4th Asia Pacific Choir Games-ah hian Shillong Chamber Choir soloist Ibarisha Lyngdoh-i chu judge tura sawm a ni. Kum 24 mi Ibarisha Lyngdoh hian hnuhma ṭha tak a lo nei tawh a, Shillong Chamber Choir-te US President Barack Obama hmaa an zai ṭum khan a lo inlan tawh a ni.
A buatsaihtu INTERKULTUR (Germany) hian kum 1988 aṭang khan khawvel huap international choir competition leh festival hi an buatsaih
ṭan tawh a, ram hrang hrangah nghah ṭhin a ni. Tun ṭumah hian INTERKULTUR hian, Colombo Cultural Hub Trust, Sri Lanka Tourism Promotion Bureau leh Sri Lanka global tea brand Dilmah-te thawhpuiin an buatsaih dawn a, ni riat chhung a awh ang.
India aṬanga tel turte
* Mizo Cardinal Choir (Mizoram)
* KC Lights (Meghalaya)
* Nagaland Chamber Choir (Nagaland)
* Ao Naga Choir (Nagaland)
* Salvation Singers (Mumbai)
* Beat Choir
* Madras Musical Association Choir
* Sargam Choir (Chennai)