Billboard Artist 100 chart-ah Tom Petty a langsar zui zel

Billboard Artist 100 chart thar berah Tom Petty chuan pakhatna a hauh leh a, he dinhmun hi a zawnin kar thum chhung a luah tawh a ni.

American singer Tom Petty hi October 2 khan a thi a, a thih hnuah a lar thar leh a ni. Chart hrang hrangah pawh a invawrh sang hle. A hmingchawia band an din, khawvel hmaa an inphochhuahna 'Tom Petty & The Heartbreakers' chuan US Billboard 200-ah pawh pahnihna a luah phak a, kar thum chhung zeta top chart-ah hian a zawnin a lang tawh a ni.

Chart tihchhuah tharah hian Kane Brown a rawn invawrh sang hle a, 57 aṭangin 5-naah a awm. Kane Brown album hralh zat hi a hma aiin 47% zetin a pung a, digital song sale-ah pawh 36% in a pung bawk. Billboard country chart-a a lan bakah, Billboard Hot 100-ah hla pahnih a lang bawk. Kane Brown hi CMA Music Fes­tival 2017 ah khan a perform a, heta ṭang hian a rawn invawrhchho leh mek a ni.

Billboard Artist 100 chart hi July 2014 aṭang khan tihchhuah a ni a, artist-te chu an album leh track hralh tam lamah te, radio airplay, streaming leh social media lama an lar dan aṭang tein teh an ni. Tun ṭumah hian top 10-ah bik hian chart hrang hranga che ṭha Imagine Dragons, Ed Sheeran, Post Malone, Taylor Swift, Sam Smith, Bruno Mars leh Cardi B te pawh an lang a ni.

1. Tom Petty And The Heartbreakers

2. Imagine Dragons

3. Ed Sheeran

4. Post Malone

5. Kane Brown

6. Taylor Swift

7. Sam Smith

8. NF

9. Bruno Mars

10. Cardi B