Blink 182-in hla thar tichhuak dawn; Worldwide Tour neih chhunzawm nghal ang

Kum 2015 hnua a vawi khatnan Blink 182 chuan world tour an neih tur thu an puang ta rup mai. Tom DeLonge, Travis Barker leh Mark Hoppus-te awmna American rock band hian an tour neih tur pual hian naktukah kum 10 hnua studio recording an neih leh hmasa ber, 'Edging' chu an tichhuak dawn bawk a ni.

Tour hi nakkum March thlaah Tijuana, Mexico aṭanga nei ṭanin, kum 2024, February thleng an nei dawn ang.

DeLonge leh Hoppus-te chuan kum 1992 khan Blink-182 hi an din a, kum 1998 khan Travis Barker hian drummer turin a lo zawm leh a nih kha.

Band hian kum 2005 khan side project dang buaipui tur an neih avangin chawlhlailawk an puang a. Kum 2009-ah music thar nen reunion tour an nei a, kum 2015 khan DeLonge chuan band hi a chhuahsan leh a, a thlaktu atan Alkaline Trio-a mi, Matt Skiba chu an lalut leh.

Hun rei tak thawm an neih loh hnuah kum 2021 khan Hoppus chuan cancer a vei thu puangin, enkawlna a dawn zawhah an pathum hian meeting-te nei lehin, tunah chuan World Tour-an neih tur thu hi an puang ta a ni.

Worldwide tour an neih tur hi Live Nation-in a produce dawn a, Latin America-a an perform vawi khatna tur a ni tel bawk. Latin America, North America, Europe, Australia leh New Zealand-ahte tour hi an nei ang.