YAMAHA Fiamthu Fest Second round thawh hnihna a hot
Yamaha Fiamthu Fest second round thawh hnihna chu Nilaini zan khan neih ṭan leh a ni a, a hot nghal hle. A tir lamah contestant-te che buai deuh mah se inelna kalphung an man hnuah a hmuhnawm a, an inbei tawk tlang hle a ni.
A zan khatnaah hian thupui atan "Zu hi a ṭha lo hlawm hlak a ni" tih hman a ni a, group B lamten a ṭhatna an sawi a, group D lamten an ṭhat loh zia uar takin an sawi ve thung. Debate anga kalpui a nih vangin thluak ṭha leh ngaihtuahna seng peihte an thusawi a ngaihnawm a, chawp leh chilha sawi tur hre nghal zung zungte an che ṭha tlangpui bawk. A zan khatnah hian C.Lalhmangaihzuala, Lalnunsanga, H.Kapkima leh A.Lalhlimmawia te che ṭha deuha ngaih an ni. Hetih rual hian midang pawh an duai chuang lo.
Top 20-a tlingte hi group A, B, C leh D-ahte ṭhen an ni a, a zan khatnaah hian group B leh D-a awm mi 10-te an inlan a ni. Intihsiakna hi C. Vanlallawma'n a kaihruai a, topic thlan chhuah sa hmangin an inel a ni. Contestant-te hian a group-in intihsiakna hi hmachhawn mah se, a mimala an chetṭhat dan a zirin point pek an ni. Result hi second round thawh khatna leh thawh hnihna neih aṭangin siam a ni ang.
Zanina inlan leh tur zingah hian fiamthu khawvela hnuhma lo nei tawh an awm nawk a, hei vang ringawt pawh hian hmaih phal chi a ni lo. Group A-a awm Hrangkapchhunga, Lalngaihsaka, Lalhmingmawia leh Zoremsiama Central Jail Veng te hi fiamthu thiam leh nuih tiza tak tak vek an ni a, an tumpuite tan chuan inbuatsaih
ṭhat viau a ngai ang. Hetih rual hian group C lam an duai bik chuang lo, Ramhlun Vengthar tlangval Lalduhawma an nei a, a ni aia fiamthu sawi thiam an awm tam bik chuang awm lo e. Live-a pekchhuah a nih avangin contestant-te an inbuatsaih ṭhat a ngai a, inpuahchahna nei ṭha an vannei a nih pawhin a mak lo ang.
Second round thawh hnihna hi zaninah chhunzawm leh tur a ni a, an thupui tur pawh "Lehlam pawh hi Vanram an kai ka ring lo" tih a ni riap mai. Fiamthu ngaina mi i nih chuan zanin dar dar 8-ah Zonet Rimawi i lo thlir dawn nia.