Dil Bechara

Bollywood superstar fam ta Sushant Singh Rajput-a film chan hnuhnun ber 'Dil Bechara' chu Zirtawpni khan digital-in tlangzarh a ni ta a, a hit nghal hle.

Disney+ Hotstar-ah online-in awlsam takin a en theih nghal bawk nen, Sushant Singh Rajput fan-te leh netizen-te chuan hmuhnawm an tih thu an sawi nasa nghal hle a, tlangzarh a nih aṭanga darkar 24 chhung lekin Internet Movie Database (IMDb)-a India film rating sang ber a ni nghal.

Mukesh Chhabra film hi John Green-a'n kum 2012-a a tlangzarh The Fault in Our Stars lehkhabu behchhana siam a ni a, Disney+ Hotstar hian an subcriber leh subscriber lem lote tan pawh a thlawnin an pe chhuak a ni.

Filmfare.com-in a tarlan dan chuan mi 21,000-in IMDb-ah hian vote thlakin rating pawh a hmu sang nghal hle a, 10-ah 9.8 a hmu phak a, 9.8 rating hmu phak film hi a tam lo hle.

Disney+ Hotstar chuan film an tlangzarh ruala entu tam ber a nih thu an sawi bawk a, mahse entu zat erawh an tarlang lo. Dil Bechara hi a trailer ringawt pawhin like-tu tam lamah record a lo siam tawh bawk a,  Sushant Singh Rajput hi a fan-te'n an ui tih chu a chiang.