YMA zaipawl thiam ber - Dawrpui Branch

Central YMA leh Art & Culture department ten Aizawla YMA branch-te tana Ramngaih Hla Zaipawl Intihsiak an buatsaih chu nimin khan a hmáwr bàwk a ni a, Dawrpui Branch YMA an thiam ber.

Ramngaih Hla Zaipawl Intihsiak hi Vanapa Hall-ah neih niin, October 10, 2022 khan ṭan a ni a, AMC huam chhunga YMA branch 34 an tel. Branch 34-te zaipawl member belh khawm chu mi 1,337 an ni.

Intihsiakna atan hla panga thlan a ni a; chu'ngte chu - 'Ro min relsak ang che' tih te, 'Râltiang i kai ve ang' tih te, 'Khuavel i la chhíng ngei ang' tih te, 'Pi pu chhuahtlang hlui' tihte leh 'Sangha vuak hla' tihte a ni. YMA zaipawlte chuan hla panga aṭangin hla chuam tur an duh ber an thlang a, hla dang pakhat ṭheuh an pawt bawk.

YMA branch 34 aṭangin top 5-ah branch paruk - Ramhlun South, Durtlang, Ramthar North, Dawrpui, Bethlehem Vengthlang leh Bawngkawn-te an tling a; top 5-te chu an intihsiak leh hnuah result puan a ni.

Zaipawl thiam bera thlan Dawrpui Branch-in Rs 1,00,000 an dawng a; pahnihna chu Durtlang Branch niin, Rs 70,000 an dawng a, pathumna Ramthar North Branch-in Rs 50,000 an dawng.

Top 5-a tling dangte'n Rs 20,000 ṭheuh an dawng a, intihsiaka tel zawng zawngte'n Rs 10,000 ṭheuh an dawng bawk. Best conductor chu Durtlang Branch conductor H Lalmalsawma a ni. Lawmmante hi Art & Culture minister R Lalzirliana'n a sem.