Lemchan khawvela mi ropui Olivia de Havilland a thi

Kum 50 chhung vel lemchan khawvela mi langsar ni phak, Oscar Award-a (Academy Award) Best Actress vawi hnih dawng thei, Olivia de Havilland chu kum 104 mi niin Inrinni khan Paris-ah a thi.

Kum 1930 chhoah khan lemchan khawvelah a lar ṭan a, Captain Blood  leh The Adventures of Robin Hood-ah inlanin a hmelṭhat leh lemchan thiam avangin ngainat a hlawh a, khawvelin a theihnghilh tawh ngai loh turin Gone with the Wind-ah a rawn langsar ta hle a ni. 

July 1, 1916-ah Tokyo-ah a piang a, a pa hnathawhna avangin Japan-a piang ni mah se  California-ah pemin a sei lian a, 1950's aṭang khan Paris, France-ah a inbengbel ta a ni. A nau hi khawvel huapa lem­chan thiam tho Joan Fontaine a ni a, unaua Oscar-a Best Actress dawng thei awm chhun an ni a; nimahsela unau mah ni se an inkar boruak hi a ṭha vak lo a, inthlawp loin an iner a, khawvel hriata unau inngeih lo an ni ta hial a ni. Fontaine zawk pawh hi a duai lo hle a, 1941 khan Oscar Award-ah Best Actress a dawng a, a u Olivia de Havilland hi a dawn khalh nghe nghe a, ani hi chu 2013 khan a boral tawh.

Olivia de Havilland hi Oscar-ah vawi nga ngawt mai nominee a ni a, 1946 khan To Each His Own film avangin Best Actress-ah thlan a ni a, 1949 khan The Heiress-a a chan thiam em avangin he chawimawina sang hi a dawng nawn leh a ni. Hei mai hi a ni lo,  Golden Globe Awards pawh vawi hnih (The Heiress leh Anastasia: The Mystery of Anna) a dawng a, New York Film Critics Circle Awards pawh ṭum hnih (The Snake Pit leh The Heiress) hlan a nih bakah chawimawina dang ṭhahnem tak a dawng.