Blake Shelton-a'n The Voice chhuahsan dawn

Emmy-winning musical competition show, The Voice orginal coach Blake Shelton chuan 2023 season zawh hnuah he show hi a chhuahsan tawh dawn tih a sawi.

Blake Shelton chuan, "Hemi chungchang hi rei tak ka ngaihtuah hnuah, season 23 zawh hnuah The Voice chhuahsan hi a hun ve tawh tiin thutlukna ka siam ta a ni," tiin a Instragramah a tarlang. "Show hian kawng hrang hrangin, a ṭha zawngin ka nun a thlak nasa hle a, ka tan chuan a pawimawh reng dawn a ni," tiin kum 12 chhung tel tawhin, The Voice tana pawimawh - NBC, producer, writer, musician, crew leh catering titute chungah lawmthu a sawi nghal bawk.

Season 22 hi neih mek niin, Shelton bakah a nupui Gwen Stefani, Camila Cabello leh John Legend-te chu coach an ni. Season 23-ah Blake Shelton chuan coach a nih anga a hun tawpna a hmang dawn ta a, Kelly Clarkson pawh a rawn kir leh dawn a, Chance the Rapper leh Niall Horan-te nen coach an ni ho ang.

Kum 2011-a The Voice tichhuah a nih ṭan aṭang khan Shelton hi coach a la ni chhunzawm reng a, original cast zingah la awmchhun a ni. Original coach dangte chu - Adam Levine, Christina Aguilera leh Ceelo Green-te an ni. Season 22 chhung hian coach dang tam tak a thawhpui hman a, heng zingah hain Usher, Pharrel Williams, Miley Cyrus, Alicia Keys, Nick Jonas, Ariana Grande leh a nupui, Gwen Stefani te an tel.