A fanu bula 'walk' duh lo Cindy Crawford!

Khawvela supermodel lar bera chhal ngam ni ṭhin Cindy Crawford hi kum 51 mi ni tawh mah se a la tar lo - modelling a la ti ve reng. A fanu kum 16 mi Kaia Gerber pawh modelling lamah a lut chho ve ṭan a; tun hnai khan show pakhatah an tel dun a, nimahsela Cindy hian an pahniha inlan rual a duh lo thung!

Tun hnaia Versace Spring/Summer 2018 fashion show-ah Cindy-te nufa hi model-ah an ṭang ve ve a, a rualin an inlan lo. Hei hi sawiin Cindy chuan, "Ka fanu Kaia an biak hma hian min be tawh a, Donatella [Versace] hian a tirah ka fanu hi a tel dawn tih pawh a hriat ka ring lo... Ka fanu pawh tel turin an sawm a, 'Kan pahnihin kan chhuak dun ang chu,' a ti a; nimahsela, 'Ka kum rualpuite bulah ka inlan duh zawk,' ka ti ve tlat a ni," tiin a sawi.

Mi tam tak chuan Kaia hi supermodel ni thei mai turah an ngai a, kum 16 lek la ni mah se a pian nalh leh zei bakah a nu vangin a lar tawh hle.

Kum 16-a professional model a ni ṭan mai chu a nu duh aiin a lar hma hret a nih hmel. 1995-a Forbes magazine-in model hlawh hnem bera an lo thlan daih tawh Crawford chuan, "Ka fanu hian lirthei khalh theihna license a nei ve chauh a ni. Model a ni ve ta mai hi ka ngaihtuah viau a; amaherawhchu he mi kawngah hi chuan ka kaihhruai theih dawn avangin ka buai lo a, a lirthei khalh lam hi ka ngaihtuah zawk chu a ni," tiin fiamthuin a sawi.

Cindy chuan, "Duh­thusam chu ni se kum hnih khatte chu la nghak deuh se a ṭha ka ti a, chutihlaiin modelling lama a luh tak si-ah chuan ka hmelhriat hnu khawvela lut tur a ni a, 'Kei aia kaihruai ṭha thei tur an awm dawn em ni?' tiin ka inhnem ta zawk a ni," a ti.