Milarten engtin nge Social Media an hman Ṭangkai?

Khawvel hmasawnnain a ken tel social media hi hmang lo tura inhrilhhriat ai chuan, hman dan thiam tura inzirtir a fuh zawk awm e. Khawvel milarte pawhin social midei hi an hmang nasa hle a, chhiatpui leh mualphopui ta fe fe pawh sawi tur an awm nuk mai.

Celebrity kan tih zingah Selena Gomez leh Chrissy Teigen-te chuan social media chu platform atan tak tak an hmang a, an mahni ngaisangtute kawm nan leh an chanchi hrilhhriat nan an hmang nasa hle a ni. Kim Kardashian, Kylie Jenner leh Justin Bieber-te'n social media kaltlangin khawvel hmuhah an inpho chuak a, an tan chuan a va hlu dawn tak em! Zaithiam, politician leh kawng hrang hranga milarten engtin nge social media hi an lo hmangṭangkai khawp tih kan hriat ve te pawh a ṭha awm e.

Justin Bieber

Justin Bieber hi youtube kaltlanga lar a ni a, lar hi hlawhtlinna a nih chuan social media hmang ṭangkai berte zing a mi a ni ngei ang. Bieber hi youtube mai ni lo, facebook leh twitter lamahte a lar zui hle a, mite ngaihven ber pakhat a ni. Twitter-ah follower maktaduai 102 a nei mek a, Instagram-ah a mah zuitu maktaduai 92 zet an awm bawk.

Selena Gomez

Zaithiamte hi social media lamah an lar zual bik emaw tih tur a ni a, Instagram-a follower ngah ber pawh American zaithiam Selena Gomez a ni. Gomez hian follower maktaduai 128 a nei mek a, an la pun belh zel dawn bawk niin a lang. "Bad Liar" singer hi social media hmang ṭangkai ber te zingah kan chhiar tel thei ang.

Donald Trump

US president hi pa tunlai ve tak, ram hrang hrang hruaitu zingah pawh social media hman nuam tiber te zinga mi a ni. US preisdent hlui Barack Obama pawh kha social media lamah a lar khawp mai a, kha tih hun lai daih tawh pawh khan Trump hian ama Twitter account kaltlang ngatin thu a lo thehdarh tawh ṭhin a ni. A campign lai aṭang rengin a hmang ṭangkai a, politician lar leh thil tithei berte zing a mi a ni der tawh. Trump hi Twitter-a follower ngah lamah 21-na a ni mek a, politician zinga zuitu ngah ber pawl a ni bawk.

Kim Kardashian

Kim Kardashian hi Justin Bieber ang thoa social media aṭnga lar chhuak tiin kan sawi thei ang. Reality star hian 'Keeping Up With the Kardashians' show a hlawhtlinpui rualin, social media-a mite ngaihven rawn a nihna hian a larna a tichiang zawk mah awm e. Instagram vela a thlak phochhuahte chu a tunlai ṭawng takin a hit hle zel a ni.

Beyonce Knowles

American zaithiam Beyoncé Giselle Knowles hi milar zingah, Instagram-a follower ngah lamah pangna a ni a, a thlalak post chu like-tu tam lamah a ber a kai hial. Beyonce hian kumin Februarythla khan Instagram-ah a pum puar tak thlalak a post a, caption-ah chuan phir neih a inbei sei thu a sawi. He a thlalak post hi mi maktaduai 11 vel zetin an like a ni.

Ariana Grande

Instagram-a follower neih tam lama pahnihna chu Ariana Grande a ni a, facebook lamah pawh a lar vet vet hle. May 22, 2017-a Manchester Arena-a concert a neih laia bomb puak avanga mi 23 an thih hnu khan social media lamah amah ngaihventu an tam phah hle a, a chanchin chu social media chaw turi ber pakhat a ni. Ariana Grande hian vanduaina tawkte a tawrhpui thu leh pawi a tih thute chu Twitter-a lamah a tarlang a, a thu post hi mi maktaduai 2.6 zetin an tweet let a ni.

Chrissy Teigen

American model lar Chrissy Teigen pawh hian social media lamah chuan account a hawng nual a nih hmel, Twitter-ah follower maktaduai riat vel a nei a, nitina a khawsak velna te chu a tarlang chei chuai reng mai a ni. Teigen hian social media kaltlangin a ngaihdan hrang hrangte a tarlang ṭhin a, politics lamte pawh a sawi lang fo a ni. Politics a sawi ṭhin vangte pawh a ni mahna, US President Donald Trump nen social media lamah an in block a ni awm e!

Kendall & Kylie Jenner

Kendall leh Kylie Jenner-te unau pawh hi social media aṭnga invawrh lar tiin kan sawi thei ang. Twitter, Instagram leh Snapchat-ahte follower an ngah em em a, Kylie Cosmetics vawrh lar nan te pawh ṭangki takin an hmang a ni. Chu chuan modeling lama an career thlengin sang takah an invawrh theih phah a ni.

Taylor Swift

Taylor Swift hi social media lama 'Queen of Marketing' ti hiala an sawi a ni. A lar vangin social media lamah pawh ngaihventu an tam a, a project hrang hrang vawrh lar nan ṭangkai takin a hmang ṭhin. Instagram-ah follower maktaduai 104 a nei a, Twitter-ah maktaduai 90 dawn a nei bawk.

Milar zingah Ellen Degeneres, Jennifer Lawrence, Meryl Streep, Bradley Cooper, Angelina Jolie, Brad Pitt, Katy Perry, Barack Obama, Rihanna leh Korian boy band BTS-te chu social media-a lar zual zingah an tel bawk.