REVOLUTION III MAGDALENE CONCERT Vanapa Hall-ah neih a ni dawn

'Save me', 'Open your Heart', 'Life beyond death'-hla sa ho leh dual dual turin inring ang aw.

Mizo Gospel Rock band lian ber zinga mi, Magdalene chuan October 28, Zirtawpni zan hian Vanapa Hall-ah concert an nei dawn. Live concert leh event vawi tam lo buatsaih tawh ṭhintu Tribal Tone Scavenger (TTS) hmalaknaa buatsaih a ni ang.

Oct 28 zana an concert zawhah November 10 hian Lamka, Manipur-ah anmahni pualin concert an nei leh nghal dawn a ni. Magdalene band hian ṭhenawm state dangte aṭangin sawmna an dawng ṭha bawk a, hmarchhak bial chu an hrut kim tawh hle. Hetianga mahni puala state pawn lam thlenga concert nei thei Magdalene band te hi an theuneu lo tih a langchiang a, tun ṭuma an concert tur pawh hi a hmuhnawmin beng a tlai leh dawn.

“Hun eng emaw chen hripui lêng leh harsatna eng eng emaw avângin duh ang thâla music lam han luh chilh pawh a harsa ṭhin khawp mai. Amaherawhchu, beisei piah lamah Tribal Tone Scavenger te hmalâknain 28th October 2022, Zirtawpni zân hian Vanapa Hall-ah keini Magdalene band te concert nei tura sâwm kan ni hi kan lâwm hle a, band kan lo din tirh aṭanga min lo ngaina a, kan band lo ngaihlu ṭhintute pawh in rilru a lo la dang chuang bik lo tih kan hriat hian min ti phûr lehzual a ni," tiin Magdalene vocalist Steward chuan hun hlimawm leh hlawk tak hmang ho leh turin, concert an neih turah hian telpui turin mipuite a sawm.

Guest band Moodstation
October 28 zana concert neih turah hian tunlai band lar tak, “Rawn Sapatal Rawh” tih hlâ aṭanga kan hriat lar, MoodStation chu guest band an ni dawn bawk a, an che ṭha leh hle dâwn tih a chiang reng!

Ticket hi Rs.500 leh Rs. 200 man tur a ni dawn a, SVR Clothing, Ramhlun South, Feet Whips Ramhlun South, Active Sound Chanmari leh Gi Infotech Zarkawt ah lei theih in a awm tawh.